Úndistanda kámelet jasqa tolmaǵandardy urlap, jezókshelikpen aınalysýǵa májbúrleıtin jaǵdaılar óte jıi kezdesedi. Olardy bir kúnde 10 adamǵa qyzmet kórsetýge májbúrleıdi, uryp-soǵady. Qorlyqtan qutyla alǵandardyń arasynda VICH aýrýyn juqtyryp, psıhologıalyq aýrýǵa shaldyǵyp jáne júkti bolyp keletinder az emes. Fotograf Sergeı Stroıtelev jeńgetaılardan jábir kórgenderge kómek kórsetip, ýaqytsha baspanamen qamtamasyz etetin úndistandyq Rescue Foundation uıymyna baryp, foto reportaj jasady.
Belgisiz adamdar 14 jastaǵy Daneshıdi 2 jyl buryn mektepke bara jatqan jolda urlap áketken. Bir jylǵa jýyq ony Mýmbaıdaǵy jezóksheler úıinde ustaǵan. Daneshıden bólek onda 50 áıel bolǵan. Olardyń barlyǵyna úzdiksiz klıentter qabyldaýǵa májbúrlegen. Polıseıler tekserý barysynda Daneshıdi qutqaryp, Boısar qalasyndaǵy Rescue Foundation uıymyna ákelgen.
Rescue Foundation-de bastan ótkergen aýyr jaǵdaıdan keıin psıhıkalyq aýrýlarǵa ushyraǵandar úshin ǵımarat bar. Olardyń arasynda 10-12 jyl boıy jezóksheler úıinde turǵandar bar.
Keıbir áıelder uıymǵa júkti bolyp keledi. Kóbiniń jasy 14-ke de tolmaǵan. Balasy joq qyzdar olardyń balalaryn oınatyp, kómektesedi. Keıde áıelder VICH aýrýyna shaldyqqanyn bilmeı balalaryna aýyr dertti juqtyryp jatady. Qazir Kandevalıde osyndaı 6 qyz turady.
Ámınanyń jasy 16-da. Ony týǵan ákesi 6 jyl buryn Ámına 10 jasqa tolǵanda jezóksheler úıine satyp jibergen. Ámınanyń ata-anasy esirtkige táýeldi bolǵan. Ol úıinen ketkenine qýanǵan. Alaıda, alda ne kútip turǵanynan múlde beıhabar edi. Ámına 5 jyl jezóksheler úıinde turdy. Ony bir jyl buryn polıseıler jeńgetaılardan qutqaryp, uıymǵa alyp kelgen. Ámına bastan ótken sumdyq jaǵdaıdan keıin sóılemeıtin bolǵan.
Boısardaǵy Rescue Foundation uıymynyń jábir kórgen qyzdar turatyn ǵımarattyń syrtqy kórinisi. Ǵımaratty qarýlanǵan kúzetshiler eki ıtpen kúzetedi. Sonymen qatar, ǵımarat tikendi symmen qorshalǵan. Mundaı saqtyq sharalary qyzdardy qaıta urlap áketpeýi úshin jasalǵan.
1999 jyly atalmysh uıym ashylǵanda qutqarylǵan qyzdardy urlap qaıta jezóksheler úıine alyp ketken jaǵdaılar kóp bolǵan. Joǵalǵan qyzdy tabý múmkin emes edi. Sebebi Úndistanda 50 myń jezóksheler úıi bar. Jeńgetaılyqpen 25 mıllıon adam aınalysady.
