Almatyda kólik reformasyn jáne qoǵamdyq kólik júıesin turaqtandyrý aıasynda jyljymaly sostavty jańalaý jáne baǵyttar jelisin ulǵaıtý jumystary jalǵasýda. Almaty ákimi Baýyrjan Baıbek jumys sapary barysynda №137 baǵyt boıynsha jolǵa shyqqan Evro-5 ekologıalyq synyptaǵy jańa avtobýstardy kórdi. Bul týraly Qamshy.kz aqparat agenttigi Almaty qalasy ákimdiginiń baspasóz qyzmetine silteme jasap habarlaıdy.
Buryndary bul baǵyt boıynsha josparlanǵan 20 kóliktiń nebári 6 ǵana jolǵa shyǵatyn, sonyń saldarynan qozǵalys ıntervaly 50 mınýt boldy. Bul baǵyt turǵyndarǵa óte qajet, kólik «Qaırat» eldi mekenin, Almaty-1 temirjol vokzalyn, Ýnıversaldy bazardy, Saıran avtobeketin, Qalqaman eldi mekenin, №7 qalalyq emhanany, Naýryzbaı aýdanynyń ákimshilik ortalyǵyn qamtıdy. Osyǵan oraı, bul baǵyt boıynsha syıymdylyǵy úlken tómen edendi 20 avtobýsy bar «Almatyelektrotrans» JSHS qyzmet kórsetýi tıis degen sheshim qabyldandy. Sonyń arqasynda baǵyttaǵy ınterval burynǵy 50 mınýttan 12 mınýtqa deıin qysqaryp, jolaýshy legi bes ese artady dep kútilýde.
«Biz eki jyldan astam ýaqyt boıy kez kelgen megapolıste kúrdeli bolyp tabylatyn kólik reformasyn júrgizýdemiz. Búdjet qarjysy esebinen avtobýstardy satyp alýdamyz, jeke tasymaldaýshylar da qozǵalmaly sostavty jańartýda. Alaıda keıbireýler jeke qarjylaryn salýǵa, naryqtyq qatynasta jumys isteýge daıyn emes, Mysaly, №137 baǵyttaǵy avtobýstar sonaý 2003 jyly ǵana jańarǵan eken. Búgingi kúni avtoparkterin jańartqan kompanıalarǵa sýbsıdıalar bólinedi barlyq tasymaldaýshylarǵa jeńildetilgen jolaýshylar úshin tólem beriledi. Qazirgi kezde aldaǵy bolashaqqa jumys isteıtin kompanıalar úshin naryq jarıaly, tıimdi, barlyq jaǵdaılar jasalǵan», -dedi megapolıs ákimi.
Baýyrjan Baıbek Almaty qalasy úshin tasymaldaý qyzmet kórsetetin 1400 avtobýstyń azdyq etetinin, qalada 2 mln adam turatynyn, sondyqtan kólikti reformalaý aıasynda turaqty jumystardyń júzege asyp jatqanyn, gazben jumys isteıtin 200 avtobýsqa eseptelgen avtoparktiń, elektroavtobýs qurastyratyn zaýyttyń, metro beketteriniń salynyp jatqanyn jáne JRK jobasynyń qolǵa alynǵanyn aıtty.
Eske salsaq, Almatyda №131, 115, 127, 12, 22, 70, 86, 65, 103, 50, 126, 112,22, 70, 86, 65, 103, 50, 126, 112 baǵyttary boıynsha jańa avtobýstar jolǵa shyǵyp, №77 baǵyt qaıta jańaryp, №1 baǵyt pen №201 magıstraldy baǵyty ashylǵan edi. Kórshi oblystan qalaǵa qosylǵan eldi mekenderdi kólikpen tolyq qamtý úshin 10 baǵyt ashyldy.
