16 aqpanda Abaı atyndaǵy Qazaq ulttyq pedagogıkalyq ýnıversıtetiniń uıymdastyrýymen «Meniń pirim – Súıinbaı» İİ respýblıkalyq jas aqyndar aıtysy ótedi.

Elimizdegi tuńǵysh JOO – Abaı atyndaǵy Qazaq ulttyq pedagogıkalyq ýnıversıtetine bıyl 90 jyl. Qazaq joǵary biliminiń qarashańyraǵy sanalatyn oqý ordasy – óz tarıhynda respýblıka mektepteri úshin 200 myńnan astam muǵalim, ǵylymı mekemelerge arnap 3 myńnan asa ǵylymı kadr daıarlaǵan biregeı bilim ordasy.

Mereıli jyl aıasynda tereń tarıhy bar, ulttyq tárbıeniń uıytqysy bolyp otyrǵan bilim ordasynda respýblıkalyq, halyqaralyq deńgeıdegi irgeli mádenı, ǵylymı, áleýmettik, qoǵamdyq, tanymdyq jáne sporttyq is-sharalar ótkizilmek.

90 jyldyq mereıtoıdyń bastaýy retinde tól ónerimizdi jańǵyrtý, aıtys ónerin keńinen nasıhattaý, jas aqyndardyń sýyryp salmalyq qabiletterin shyńdaý maqsatynda 2018 jyldyń 16 aqpanynda respýblıkamyzdyń joǵary oqý oryndarynyń jas aqyndary arasynda «Meniń pirim – Súıinbaı» taqyrybynda dástúrli İİ respýblıkalyq jas aqyndar aıtysy ótkiziledi.

Dástúrli aıtysqa respýblıkamyzdyń 23 joǵary oqý ornynan 40-tan asa stýdent aqyn qatysady.

Alaman dodaǵa túsetin jas aqyndar aıtysyna Qazaqstan respýblıkasynyń eńbek sińirgen qaıratkeri, halyqaralyq «Aıtys aqyndary men jyrshy-termeshiler» odaǵynyń basqarma tóraǵasy, áıgili aqyn Júrsin Erman bastaǵan qazylar alqasy tórelik etedi. Júrgizýshi – aıtysker aqyn Shuǵaıyp Sezimhan.