Astanada «Abý Dabı Plaza» jumysshylaryn eńbekke ornalastyrý boıynsha keshendi jospar ázirlenip jatyr, dep habarlaıdy Qamshy.kz aqparat agenttigi Astana ákimdigi saıty deregin negizge ala otyryp.
Esterińizge sala ketsek, 2018 jyldyń 5 aqpanynda Astana qalalyq "Nur Otan" partıasynyń fılıalyna "Abý Dabı Plaza" nysany qurylysynyń merdigerlik mekemesiniń 62 jumysshysy kelip shaǵymdandy. Qurylysshylardyń shaǵymdanýyna "World Monitoring" JSHS, "Ekspo Stroı" JSHS, "Kazahstan Stroı Tehno" JSHS, "Kazınjınırıng provaıder" JSHS merdiger mekemelerimen eńbek kelisimshartynyń merzimi bitýine baılanysty kelisimdi buzýy sebep bolǵan.
Qala ákimi Á. Isekeshev Astana qalalyq "Nur Otan" partıasy fılıaly tóraǵasynyń birinshi orynbasary B. Saparovtyń tóraǵalyǵymen quramynda "Astana qalasy eńbek, jumyspen qamtý jáne áleýmettik qorǵaý" MM, "Astana qalasy ishki saıasat basqarmasy" MM, prokýratýra jáne Astana qalalyq İİD, "Atameken" UKP, Astana qalasy kásipodaq ortalyǵy men qoǵamdastyq bar jumys tobyn qurdy.
8 aqpan kúni jumys tobymen Astana qalalyq "Nur Otan" partıasy fılıalynda merdiger mekemeniń ókilderimen jáne nysannyń burynǵy jumysshylarymen kezdesý ótkizilip, merdiger mekemelerdiń qyzmetkerler aldynda áleýmettik jaýapkershilik pen quqyqtyq qarym qatynasy talqylandy. Kezdesýdiń nátıjesinde 4 merdiger mekeme atqarylǵan jumystardyń spesıfıkalyq kúrdeliligi baryn, sondaı-aq aýyr jumys kestesin eskerip, burynǵy qyzmetkerlerge aqshalaı syıaqy berýdi sheshti. Kezdesý barysynda qurylysshylarǵa QR Eńbek Kodeksine sáıkes quqyqtaryn túsindirdi jáne kelesi joly jumysqa ornalasar kezde olardyń astanalyq Jumyspen qamtý ortalyǵyna kelip, óziniń zańdy múddesin saqtaý maqsatynda eńbek kelisim shartyn bekiterde tegin zań keńesin alýǵa bolatynyn aıtty.
Odan basqa jumysshylardy eńbekke ornalastyrý maqsatynda 10 aqpanda Astana qalalyq "Nur Otan" partıasynyń fılıalynda Astanadaǵy qurylys kompanıalarynyń basshylaryn shaqyryp, bos oryndarǵa jármeńke ótkizdi. Jármeńke nátıjesinde bos orynǵa 51 adam jumys berýshilerge ótinish qaldyrdy. Al "Abý Dabı Plaza" nysanyndaǵy qurylys-montaj jumystaryn aıaqtaý sharalaryna qatysty sýbmerdiger mekemeler jumys ornyn josparly túrde azaıtpaq. Osyǵan baılanysty jumys toby jumystan bosap qalǵandardy eńbekke ornalastyrý boıynsha keshendi jospar ázirlenýde.
