Birikken Ulttar Uıymymen ózara is-qımyl táýelsizdiktiń alǵashqy kúnderinen bastap Qazaqstannyń syrtqy saıasatynyń basym baǵyty bolyp tabylady. Bul týraly Syrtqy ister mınıstri Qaırat Ábdirahmanov Almatyda ótken «Qazaqstan-BUU: tájirıbe, jetistikter men yntymaqtastyqtyń keleshegi» atty joǵary deńgeıdegi jınalys barysynda sóılegen sózinde aıtty. İs-shara BUU-nyń Qazaqstandaǵy alǵashqy keńsesi ashylýynyń 25 jyldyǵyna arnaldy, dep Qamshy.kz aqparat agenttigi CA-News-ke silteme berip jazady.
Qaırat Ábdirahmanov óz sózinde Qazaqstan Prezıdenti Nursultan Nazarbaevtyń negizgi halyqaralyq bastamalary dál osy BUU-nyń trıbýnasynan usynylǵanyn atap ótti. Jahandyq uıym memleket basshysynyń keń aýqymdy ıadroǵa qarsy jáne soǵysqa qarsy bastamalaryn nasıhattaýdyń basty alańy.
–BUU uıymdary men baǵdarlamalary Qazaqstannyń áleýmettik-ekonomıkalyq damýyna eleýli úles qosyp,bul dástúrdi jalǵastyrýda. Sonymen birge, BUU bizdiń elimizge burynǵy Semeı ıadrolyq polıgonyn saýyqtyrý, Aral teńizin qalpyna keltirý sekildi mańyzdy jobalar aıasynda tehnıkalyq jáne qarjylyq kómek kórsetti, – dedi óz sózinde Qaırat Ábdirahmanov.
Syrtqy ister mınıstri Qazaqstan men BUU genderlik teńdikti ilgeriletý, balalardyń quqyqtaryn qorǵaý, densaýlyq saqtaý, ekologıa, kóshi-qon, esirtki tasymalyna qarsy kúres jáne basqa da salalarda birlesip, belsendi jumys atqaryp jatqandyǵyn atap ótti.
Qaırat Ábdirahmanov eń bedeldi organ – BUU Qaýipsizdik Keńesindegi Qazaqstannyń jýyrdaǵy tóraǵalyǵyna erekshe nazar aýdardy. Tóraǵalyq aıasynda Prezıdent N. Nazarbaevtyń bitimgerlik bastamalaryna jáne Ortalyq Azıada beıbitshilik, qaýipsizdik pen damý aımaǵyn qurý boıynsha sharalaryna ekpin qoıyldy.
Sonymen qatar, kezdesý barysynda Almaty qalasynda 2030 jylǵa deıin Ortalyq Azıada Turaqty damýdyń maqsattaryn júzege asyrýǵa járdemdesýge baǵyttalǵan BUU habyn qurý jónindegi Qazaqstannyń ıdeıasyna BUU tarapynan qoldaý bildiriletini atap ótildi.
Eldegi jáne aımaqtaǵy BUU qyzmeti týraly pikir almasý qatysýshylarǵa Uıymnyń kóp qyrly jumysyn júıeleýge jáne otyrysta maquldanǵan 2018-2020 jyldarǵa arnalǵan Qazaqstan-BUU birlesken is-qımyldar jospary aıasynda ózara árekettesýdiń keleshegin aıqyndaýǵa múmkindik berdi. Sonymen qatar, mereıtoılyq is-sharaǵa Almaty qalasynyń ákimi Baýyrjan Baıbek, Qazaqstandaǵy BUU agenttikteriniń basshylary, dıpkorpýstyń ókilderi, dıplomatıalyq qyzmet ardagerleri, akademıalyq jáne sarapshylyq qaýymdastyqtardyń ókilderi qatysty. SİM basshysy men Almaty Ákimi BUU Keńsesi osydan 25 jyl buryn elimizde óz jumysyn bastaǵan «Qazaqstan» qonaq úıinde estelik taqtaıdy ashty.
