Anna Sheıder! Bul esim tyńdarmandarǵa 2000-shy jyldardyń basynda tanyldy. Temirtaýdyń túlegi «Sýperstar kz» jobasynda jarqyraı kóringen. 2007 jyly ol Gollıvýdqa attandy. Sahnadaǵy 1 mınýtqa jeter-jetpes ýaqytta kórsetken óneri oǵan 2 altyn, 2 kúmis, 1 qola medalmen qosa, Gollıvýd prodúserimen kelisim-shartqa otyrýǵa múmkindik áperdi.

Daryndy jastyń tabıǵı talantyn áriptesteri de moıyndady. Óıtkeni Anna Sheıder kúmis kómeı ánshi ǵana emes. Onyń boıynda óner ataýlynyń san túri toǵysyp jatatyn. Annanyń armany kóp edi. Ol únemi izdenýmen boldy. Darynyn shyńdap, bıik belesterdi baǵyndyrýdy kózdedi. Alaıda ómir aǵysy kútpegen jerden múlde basqa arnaǵa aýnap tústi. Jaqyndary men dostary 2008 jyldyń 2-inshi qyrkúıeginde Anna Sheıder men onyń prodúseri, belgili kásipker Georgıı Barmınnen kóz jazyp qaldy.

Bul qylmystyq oqıǵa qalaı bolyp edi? Qandyqol qaraqshylar qandaı sebeppen eki adamnyń ómirin qıdy? Bul saýal osydan 10 jyl buryn Almaty tergeýshileriniń de tún uıqysyn tórt bólgen. Biraq qylmysty ashý ońaı bolǵan joq. Óıtkeni yqtımal degen nusqalardyń sany seksennen asyp tústi.  Ár nusqa búge-shigesine deıin zertteldi. Onyń ishinde Georgıı Barmınnyń bıznesine jáne shoý-bızneske qatysy bolýy múmkin degen nusqalar da qarastyryldy. Anna Sheıder reseılik shoý-bıznes ókilderimen de baılanysta bolǵan. Eki arada hattar almasylǵan. Aqsha aýdarymdary jasalǵan. Bul nusqa da zertteldi. Biraq eshbiri nátıje bergen joq.

Georgıı Barmın

2000 jyldary asa tabysty kásipker retinde tanylǵan Georgıı Barmın qazaqstandyqtarǵa «Zerkalo» gazetiniń quryltaıshysy, «Saryrqa juldyzdary» festıváliniń jetekshisi retinde de belgili edi. Onyń Annamen tanystyǵy da osy festıválden bastaldy. Georgıı Barmın 2003 jyly Qaraǵandy oblystyq máslıhatynyń depýtaty da bolǵan. Al qylmys oryn alar kúni, ıaǵnı, 2008 jyldyń 2-inshi qyrkúıeginde ol Temirtaýdan Almatyǵa ushyp kelgen. Ózara kelisim boıynsha, ánshi prodúserin áýejaıdan kútip alýy tıis edi.

Anna Sheıder men Georgıı Barmınniń iz-tússiz ketkeni týraly habarlama onyń týystary tarapynan Almaty QİİB-na tek qyrkúıektiń 13-i kúni ǵana túsken. İz kesý jumystary osydan keıin ǵana bastalyp, 4 aıǵa sozyldy. Munyń sebebin tergeýshiler qylmyskerlerdiń asqan daıyndyǵymen jáne ásire saqtyǵymen túsindiredi. Máselen ol kezde uıaly telefondaǵy baılanystardy tekserý arqyly qandaı da bir qylmysty ashý múmkin bolmaǵan eken. Al qylmyskerler ózderi qurǵan jospardy júzege asyrý maqsaty úshin sim-kartasymen qosa 4 jańa telefon satyp alady. Aldaǵy josparlary týraly tek osy telefondar arqyly ǵana sóılesken.  Jáne osy telefondarmen baılanysqanda negizgi telefondaryn úılerinde qaldyryp ketip otyrǵan.

Degenmen polıseılerge mynadaı jaǵdaı belgili boldy: qyrkúıektiń 3-i kúni Georgıı Barmın balasy Iýraǵa habarlasyp, 500 myń AQSH dollary qajet bolǵanyn aıtady. Bul qarjyny shuǵyl Almatyǵa jetkizip, Andreı esimdi adamǵa berýdi ótingen. Al kelesi kúni taǵy 90 mln. teńge surap, balasyna telefon soqqan. Iýra Barmın ony da Andreıdiń qolyna ustatady. Alaıda ol ákesiniń daýysyn osydan keıin estı almaǵan.

Qylmystyq is derekterine qaraǵanda, birer kúnniń ishinde-aq uıymdasqan qylmystyq top kásipkerdiń ulynan 3 mln. dollarǵa jýyq qarjy alyp úlgergen. Biraq olarǵa munyń ózi az kórindi. Kóp keshikpeı, qylmyskerlerdiń biri marqum Georgıı Barmınniń atynan taǵy da baılanysqa shyǵyp, Iýradan aqsha suraǵan.

Bul jiptiń ushyn ustaǵanmen teń edi. Alaıda elektrondyq pochtamen baılanysqan adamnyń kim ekenin anyqtaý qıynǵa soqty. Qylmysker únemi ártúrli kompúterlik klýbtardan ǵana habarlama jiberip otyrǵan. Al suraǵan qarjysy daıyn bolǵanda, taǵy da habarsyz ketip, tek jeltoqsannyń 4-i kúni baılanysqa shyqqan. Mine, dál osy kúni Andreı ustaldy. Onyń shyn aty-jóni Anatolıı Afınogenov bolyp shyqty.

Dmıtrıı Kostısın

Birinshi jáne ekinshi kezdesýde de aqshany osy Afınogenov alǵan. Biraq ol Barmın men Sheıderge qatysty qylmystan múlde habarsyz edi. Onyń  mindeti  Barmınniń balasynan alǵan  aqshany qanquıly qylmystyń uıymdastyrýshysy Dmıtrıı Kostısınge jetkizý ǵana bolǵan. Ol bul aqshanyń qaıdan jáne qandaı jolmen kelip jatqanyn bilmegen. Tek kelisilgen ýaqytta baryp, alǵanyn jetkizip berip otyrǵan. Osy qyzmeti úshin birinshisinde 10 myń dollar, ekinshisinde 14,5 myń dollar syıaqy alǵan.

Qylmyskerlerdiń quryqtalýyna ilik bolǵan bir qyzyqty derek mynaý: qylmystyq toptyń kósemi aram jolmen túsken oljany serikterimen teń bólisken. Barlyǵy da aıaq astynan baıyp shyǵa kelgen. Degenmen qýlyǵyna quryq boılamaıtyn Kostısın belgili bir ýaqyt ótkenshe eshkimniń qundy zat (kólik, páter t.b) satyp alýyna bolmaıtynyn qatań eskertken. Sóıtken, adamnyń ózi basty talaptan jańyldy. Oǵan sebepker – sol baıaǵy aram aqsha. Dmıtrıı Kostısın serikterine bildirmeı, kásipkerdiń ulymen taǵy bir márte sóılesip kórýge bekinedi. Ózin «ákeńniń dosymyn» dep tanystyrǵan Kostısın: «Bizde bári keremet! Ákeń ekeýmiz teńizde demalyp jatyrmyz. Keshe biraz ishimdik iship edik, sonyki shyǵar, ákeń uıyqtap jatyr. Saǵan Almatyǵa aqsha jóneltsin dep edi» deıdi.

Al Georgıı Barmın eshqashan araq ishpegen adam eken. Sondyqtan da balasy birden kóńiline kúdik alǵan. Mine, Afınogenovtiń ustalýyna naq osy áńgime sebepker. Osylaısha, serikterinen jasyryp, taǵy bir márte baıyp qalǵysy kelgen Dmıtrıı Kostısın búkil toptyń ustalýyna múmkindik jasap berdi.

Ókinishke qaraı, ánshi de, onyń prodúseri de áldeqashan kóz jumǵan bolatyn.

Sergeı Kabrınskıı

Endi oqıǵanyń qalaı órbigenine keleıik. Dmıtrıı Kostısın adam urlap, aqsha bopsalaý jónindegi josparyn kóktemnen bastap oılastyrǵan. Onyń tapsyrmasy boıynsha serikteriniń biri Sergeı Kabrınskıı Jansúgirov kóshesindegi jer úılerdiń birin shilde aıynda jalǵa alady. Óıtkeni úıde qojaıynnyń turmaýy, aınalasy bıik dýalmen qorshalǵany jáne aýlasynyń keń bolýy Kostısın qoıǵan talapqa saı kelgen. Al nelikten qandy qylmystyń qurbany Almatydan emes, Temirtaýdan tańdaldy?

Qylmystyq is derekterine qaraǵanda, Kostısınniń ákesiniń úlken qurylys kompanıasy bolǵan. Osy kompanıa Barmınniń kompanıasy alǵan qurylys nysanyna merdiger retinde jumys isteýge umtylǵan. Biraq arada eshqandaı kelisim jasalmaǵan. Degenmen olar Barmınniń iri kásipker ekenin, onyń kompanıasynyń jyldyq kirisi 100 mıllıon dollarǵa deıin jetetinin óte jaqsy bildi.

Arlan Ábekenov

Qyrkúıektiń 2-si kúni Anna Sheıder prodúserin áýejaıdan kútip alý úshin onyń júrgizýshi Arlan Ábekenovtiń kóligine mingen.  Alaıda áýejaıǵa barar baǵyty Fızýlı kóshesine kelgende ózgerip, kólik basqa dańǵylǵa túsken. Biraq beıkúna boıjetken kóńiline esh kúdik almaǵan. Tek avtokólik áldebir úıdiń aýlasyna kirgende ǵana jandármen syrtqa umtylǵan eken. Ókinishke qaraı, bári kesh edi.

Sálden soń bul úıdiń jertólesine kásipker de jetkiziledi. Al munyń barlyǵy Georgıı Barmınniń júrgizýshisi Arlan Ábekenovtiń qatysýymen júzege asqan. Tipti onyń jumysqa ornalasýynyń ózi qylmystyq jospardyń senarıinde bar edi. Aıtalyq, Ábekenovtiń Barmınniń kompanıasyna kelýin Kabrınskıı uıymdastyrǵan. Ol muny tanystary arqyly júzege asyrǵan. Jáne Ábekenov jaı ǵana júrgizýshi emes, bas dırektordyń kómekshisi qyzmetin qosa atqarǵan eken.

Qylmyskerler ánshi men kásipkerdi úıdiń jertólesine túsirip, baılap tastaıdy. Sosyn uryp-soǵyp, qorqytyp-úrkitýdiń san túrin qoldanady. Qatigezdikpen qorlaýdyń kúshti bolǵany sonsha, qaltaly kásipker 2 kúnniń ishinde-aq balasy arqyly qylmyskerlerge 3 mln. dollar aqsha berýge májbúr bolǵan. Biraq qomaqty qarjy onyń ómirin saqtap qala almady.

Áý bastaǵy qylmyskerlerdiń josparynda Annany óltirý týraly oı bolmaǵan. Alaıda olar ánshi úshin kásipkerdiń kez-kelgen somadaǵy aqshany tóleýge daıyn ekenin sezetin. Sondyqtan Georgıı Barmındi qalaı da qolǵa túsirý úshin olar aldymen Annany urlap áketýdi jón kórse kerek. Al keıin qylmystyń izin jasyrý máselesi aldyńǵy orynǵa shyqqanda olar artyna tiri kýáger qaldyrǵysy kelmegen.

Degenine jetken soń marqumdardyń denesin tereń shuńqyr qazyp, aýlaǵa kómedi. Kúdik týmas úshin ústine jańa dárethana ákelip qoıady. Bul qyrkúıektiń tórtinen besine qaraǵan túni bolǵan sumdyq oqıǵa. Degenmen olardyń qandy qylmysty jasyrmaq bolǵan pıǵyldary júzege aspady.

«Dánikkennen qunyqqan jaman» degen, qaraqshylar ózderi qazǵan orǵa ózderi tústi. Olardyń bárine aýyr jaza taǵaıyndaldy. Arlan Ábekenov 18 jylǵa sottalsa, qylmystyń basty uıymdastyrýshylary Dmıtrıı Kostısın men Sergeı Kabrınskıı 25 jylǵa bas bastandyǵynan aıryldy.

Sansyzbaı Nurbaba