Qyzylordadaǵy atys kezinde jaralanǵan 18 jastaǵy stýdent kóz jumdy. Al oǵan tapa-tal túste kóshede oq atqan azamat qazir tergelip jatyr. Keshe qalanyń qaq ortasynda bolǵan qandy oqıǵaǵa naqty ne sebep ekeni ázirge belgisiz. Al kúdikti 8 azamatty qolǵa túsirgen polıseıler qazir qylmystyq is qozǵap, olardyń bárinen jaýap alyp jatyr.

Qyzylordanyń qaq ortasynda tapa tal-túste bolǵan atysty shahar turǵyndary vıdeoǵa túsirip alǵan. Onda qashyp kele jatqan jigittiń sómkeden qarýǵa uqsas zatty shyǵaryp, ózin qýǵan toptyń artynan júgirgeni anyq kórinedi. Keıin gúrs etken myltyqtyń daýysynan sol aýmaqta bolǵan jurt shoshyp, jan-jaqqa qasha jóneledi.

Al atylǵan oq Azamat Bazyl esimdi stýdentke tıgen. Birneshe dene jaraqatyn alǵan jigitke dárigerler shuǵyl ota jasaǵanymen, onyń ómirin saqtap qalý múmkin bolmady.

KTK jańalyqtarynyń habarlaýynsha, Qyzylorda oblysy densaýlyq saqtaý basqarmasynyń resmı ókili Nurjamal Tursynbaeva dárigerlerdiń balanyń ómirin aman alyp qalýǵa bar kúsh-jigerin salǵanyn aıtady.

Degenmen, tıgen oqtyń nátıjesinde balanyń ishki aǵzalarynyń barlyǵynyń búlingeni anyqtaldy. 3 jarym saǵatqa sozylǵan otanyń nátıjesi sátsiz bolyp, bala qaıtys boldy.

Qaıǵydan qan jutqan marqumnyń týystary balany kimderdiń jáne ne úshin atyp ketkenin túsine alar emes. Aıtýlarynsha, Azamat úlgili stýdent bolǵan. 18 jastaǵy jigit Qyzylordadaǵy medısına kolejinde «Feldsher» mamandyǵy boıynsha bilim alyp júripti. Oqıǵa ornyna jetken onyń týǵan aǵasy onda jedel-járdem tym kesh shaqyrtyldy dep otyr.

-Joldyń qaq ortasynda jatyr qansyrap, aınalasy tolǵan polısıa. Halyq bári qarap tur. Joldy ashyp berseńdershi dep jalyndym. Oń jaq búıreginen tıgen oq bytyradan. Qolymnan qysyp «aǵa, bári jaqsy» bolady dedi, - deıdi týǵan aǵasy Aıbek Bazyl. 

Al tártip saqshylary kúndiz bolǵan atysqa qatysy bar degen kúdikpen 8 adamdy qolǵa túsirgen. Qazir qylmystyq kodekstiń birneshe baby boıynsha is qozǵalyp, ustalǵandardyń bárinen jaýap alynýda. Qandy oqıǵa keshe ǵana shahardyń Áıteke bı kóshesiniń boıynda bolǵan edi. Al oǵan ne sebep ekenin polıseıler tergeý qupıasy dep aıtpaı otyr. Sol jerde jaraqat alyp, keıin kóz jumǵan Azamat Bazyldyń denesi erteń jer qoınyna tapsyrylmaq.