QR memlekettik hatshysy Gúlshara Ábdihalyqova prezıdent Nursultan Nazarbaevtyń «Jas Otan» jastar qanatynyń  IV sezine qatysýshylarǵa arnaǵan quttyqtaý sózin oqyp berdi, dep jazady Qamshy.kz aqparat agenttigi.

«Jas Otan» – meniń barlyq strategıalyq bastamalarym men saıasatymdy qoldap kele jatqan, senimdi tiregime aınalǵan bedeldi uıym. Táýelsizdiktiń alǵashqy kúnderinen bastap jastar máselesi meniń de, memlekettiń de eń basty nazarynda bolyp, bul salada kóptegen baǵdarlama júzege asyryldy. Men osynaý eńbektiń jemisi men qamqorlyqtyń jylýyn jastardyń jaqsy biletinine kámil senemin», — delingen quttyqtaý hatta. 

Nazarbaev uzaq merzimdi maqsattarǵa qol jetkizý úshin álemdegi qarqyndy ózgeristerge daıyn bolyp, zaman kóshinen qalmaý kerektigin aıtty. 

«Bolashaqqa baǵdar – rýhanı jańǵyrý» maqalamda men 21 ǵasyrdaǵy ulttyq sana týraly jáne taıaý jyldarda qolǵa alýdy qajet etetin mindetterge erekshe nazar aýdardym. Solardyń qatarynda latyn álipbıine kóshý, «Sıfrlyq Qazaqstan» baǵdarlamasy, úshtildi bilim berý sıaqty mindetterdi eldik múddeniń jańa deńgeıi dep atap óter edim. «Tórtinshi ónerkásiptik revolúsıa jaǵdaıyndaǵy damýdyń jańa múkindikteri» atty bıylǵy joldaýymda jańa zaman talaptaryna beıimdelý men jetistikterge jetýdiń joldaryn qarastyrdym», - deı kele óziniń bes áleýmettik bastamasynyń júzege asýy úshin jastardyń bilimine asa nazar aýdarý qajet ekenin eskerdi.

«Kúni keshegi halyqqa úndeýimde de ózimniń bes áleýmettik bastamamdy usynyp, ony júzege asyrýdyń tıimdi tetikterine toqtaldym. Osynyń barlyǵynda men jastardyń sapaly bilim alyp, básekege qabiletti maman bolyp qalyptasýyna erekshe kóńil bólip, soǵan basymdyq berdim. Óıtkeni sender elimizdiń erteńi ǵana emes, meniń bastamalarymdy júzege asyratyn býynsyńdar. Men senderdi belsendi túrde jan-jaqty damýǵa, sportpen, ónermen aınalysýǵa, shet tilderdi úırenýge, otandyq jáne álemdik ádebıettiń tereń muralaryn tanyp bilýge, eń bastysy árqaısyńdy óz salalaryńda álemniń eń ozyq mamandarymen ıyq tirestirip, qatar tura alatyndaı deńgeıge kóterilýge shaqyramyn», — dedi Elbasy. 

Aıta ketsek, Astanada keshe «Jas Otan» jastar qanatynyń tórtinshi sezi bastaldy. Búgin «EKSPO-2017» Kongres ortalyǵynda «Jańa álemge jol salamyz» atty gala-forým ótip jatyr. Oǵan elimizdiń barlyq óńirinen kelgen 1500-den asa belsendi jasotandyq qatysýda.