Qazaqstan Respýblıkasy Densaýlyq saqtaý mınıstrligi Qazaqstan turǵyndaryna jadynama jarıalady, dep habarlaıdy Qamshy.kz aqparat agenttigi.
"Aýrýdyń ádettegi sýyq tıý sıaqty jasyryn ótýi múmkin ekendigine baılanysty dárigerge ýaqtyly qaralý qajet. Menıngıtke kúdik paıda bolǵan jaǵdaıda pasıent ınfeksıalyq aýrýlar aýrýhanasyna shuǵyl emdeýge jatqyzylady.
Menıngıttiń aldyn alý úshin:
- Qajet bolmasa, adamdar kóp jınalatyn jerlerge, saýda-oıyn-saýyq keshenderine, nashar jeldetiletin úı-jaılarda ótkiziletin mádenı-kópshilik is-sharalarǵa barýdy shekteý;
– Sýyqtamaý jáne aýa-raıyna qaraı kıiný kerek.
- Qoldy jýyńyzdar. Aýrý juqtyrýdy boldyrmaý úshin qoldy muqıat jýǵan óte mańyzdy. Balalaryńyzdy qolyn jıi jýýǵa úıretińizder, ásirese tamaq ishý aldynda, qoǵamdyq orynda bolǵannan keıin, sondaı-aq janýarlardy ustaǵannan keıin;
- Óz densaýlyǵyńyzdy baqylańyzdar. Jaqsy demalyp, júıeli túrde sportpen aınalysyp jáne durys tamaqtanýdy ustana otyryp, ózderińizdiń ımýndyq júıelerińizdi saqtańyzdar;
– Naýqaspen qarym-qatynasta bolǵan adamdar medısına qyzmetkerleriniń baqylaýymen profılaktıkalyq maqsatta antıbıotıkterdi qabyldaý jónindegi dárigerdiń taǵaıyndaýyn oryndaýy kerek" dep eskertedi.
QR Densaýlyq saqtaý mınıstrligi ata-analarǵa da keńes berdi.
"Qurmetti ata-analar! Qazirgi ýaqytta menıngıtpen syrqattanýshylyqtyń maýsymdyq kóterilýi baıqalady. Sizderden balalaryńyzdyń densaýlyq jaǵdaıyna barynsha muqıat bolýdy suraımyz.
Menıngokok ınfeksıasy — bakterıalar týdyratyn jiti ınfeksıalyq aýrý, ol ártúrli klınıkalyq belgilermen – sımptomsyz tasymaldaýshylyq, nazofarıngıtten (muryn men jutqynshaq silemeıli qabyǵynyń qabynýy) bastap menıngokok sepsısine (qannyń juqtyrýy) deıin bolady.
Menıngıt kenetten bastalady: kútpegen jerden qatty bas aýyrý, qusý, 6-15 saǵattan keıin bórtpe paıda bolady, temperatýra 39-40°S-qa jetedi, adam qaltyraıdy. Teri bozarady. Jalpy álsizdik, arqanyń jáne aıaq-qoldyń syrqyraýy baıqalady. Naýqas adam shóldeıdi, tábeti nasharlaıdy. Aýrý jeńil túrde ótýi múmkin, sondyqtan óte qaýipti túrde ótetinin aıta ketý kerek, ol tumaý, baspa, sýyq tıý, tonzılıt jáne t.b. sıaqty «zıansyz» aýrýlarǵa uqsas bolady. Tońý, aýyrý, qatty sharshaýdan organızmniń qorǵanysh kúshteriniń álsireýi sıaqty qolaıly jaǵdaı paıda bolǵanda menıngokok bas mıynyń qabyǵyna tez ótedi jáne qabynýdy týdyrady.
Infeksıanyń kózi naýqas adamdar jáne «deni saý tasymaldaýshylar», ıaǵnı qandaı da bir klınıkalyq belgiler joq, biraq menıngokok tasymaldaýshylary bolyp tabylatyn adamdar.
Qurmetti ata-analar!
Balalaryńyzdyń densaýlyǵy óz qoldaryńyzda!!!
Ata-analar, bizdiń usynymdarymyzdy este saqtańyzdar, basqa ata-analarmen, ózderińizdiń kámelettik jasqa tolǵan balalaryńyzben jáne dostaryńyzben osy aqparatty bólisińizder! Aýrýdyń aldyn alýdyń ońaı ekenin bilińizder!".
