Qazaq tili taǵy qorlandy. Taǵy Qazaqstanda, óz elimizde, óz jerimizde. Memlekettik tildi aıaq asty etken ózge ulty ókili emes, óz qazaǵymyz. Áleýmettik jelide «Janym baklajanym» degen laqap atpen tanymal bloger Aıdyn Toqsanbaeva Feısbýktegi paraqshasynda elimizdegi memlekettik tilge degen qurmettiń joıylǵandyǵynyń bir kórinisin jazypty. Meıramhana qyzmetkerleri Aıdyn hanymǵa qazaq tilinde qyzmet kórsetý bylaı tursyn, dórekilik tanytyp tildi de, áıeldiń ózin de kemsitýge deıin barǵan. İstiń mán-jaıyn bilý úshin blogerdiń ózine habarlastyq. Til máselesi ýshyqqanda Qamshy.kz aqparat agenttigi únsiz qalmaıdy. Memlekettik tildiń qorlanyp jatqanyn baıqasańyzdar, redaksıamyz sizderdi tyńdap, máseleni sheshýde atsalysýǵa daıyn.

Al Aıdyn Toqsanbaeva kúni keshe basynan ótken oqıǵasyn bylaı baıandady.

«Balammen Abaı jáne Altynsarın kósheleriniń qıylysyndaǵy «Moskva» saýda ortalyǵynyń ishindegi Coppola meıramhanasyna baryp tamaqtanbaq boldym. Kirgennen ákimshiligi maǵan «Zdravstvýıte!» dep orys tilinde amandasty. Oıymda eshteńe joq men tynysh qana kúldim de, ótip kete berdim. Daıashy qyz da orys tilinde sóıledi, eshqandaı oısyz men de orys tilinde jaýap qattym. Balamdy uıyqtatyp, jaıǵasyp otyra berdim. Birde álgi daıashy qyzdan qaınaǵan sý suraǵan edim, meni túsinbegen boldy. «Chto?» dep oryssha suraıdy menen. Qanymnyń qaınaǵany-aı! Onda da úndemedim. Tek tamaq-shaıymdy iship bolǵan soń ákimshilikke bardym da «Sizderde bári jaqsy, unady, tek qazaq tilinde sóıleý, jaýap berý degen joq eken. Bolashaqta sony eskerseńizder eken, taǵy qaıtalansa, zańǵa júginemin» dep tikesinen aıttym. Álgi menedjer meni túsinip keshirim suraı ma degen oıda bolǵan, joq, ózime tap berdi. «Razve esttakoı zakon? My svobodnaıa strana, razgovarıvaem na dvýh ıazykah» dep menimen ursysýǵa daıyn tur. Ań-tań boldym, dál osyndaı reaksıany kútpedim.

Qatty ashýlandym, tutynýshy retinde meniń quqyǵym buzylyp tur. Sóıtip zańdy jaqsy túsinetin dosym Máýlen Alǵazyǵa habarlasyp, meıramhanaǵa qaıta bardyq. Zań turǵysynan da, adamı qarym-qatynas turǵysynan da meıramhana ákimshiliginiń istegeni durys emes ekenin zańdy kózine shuqyp turyp kórsettik. Onyń da kózi jetken bolar. İshteı keliskenin baıqadyq. Sóıtip óz tilimizdiń quqyǵyn qorǵap qalý úshin ákimshilikke mynadaı eki usynys tastadyq: «endigi dórekilik qaıtalanbaıtynyn aıtyp, óz tilimizde surasa tilimizdi, sóılegen halqymyzdy, syılap óz tilimizde jaýap qaıtaramyz, as mázirin de óz tilimizde engiziledi dep aıtyp keshirim suraý kerek nemese zań boıynsha isti sotqa deıin jetkizemiz». Biraq álgi jigit vıdeony óshirýimizdi surady. Vıdeo qosýly tursa, eshteńe de aıtpaıtynyn jetkizdi.

Bul jerde tóbelesip, eshkimniń basy jarylmady. Biraq bekitilgen zańdy buzyp turǵanyń joqqa shyǵardy. Basqa ult ókilderi de tek qazaq tilinde sóıleıtin meıramxanaǵa baryp orys tilinde sóılemegeni úshin dál men sekildi quqyǵyn talap ete alady, sebebi bul jeke tulǵa atynan emes, mıeramhana atynan sóılep turǵan jandar. 

Biz oılanbastan 102-ge xabarlasyp, aryz jazdyq.  Eń bastysy is bastaldy, arǵysyn kóremiz», - dedi Aıdyn hanym Qamshy.kz aqparat agenttiginiń tilshisine.  

Qazaqtyń namysy men tiliniń qorlanyp jatatyn jaǵdaılar eki-úshpen shektelmeıdi. Joǵarydaǵy oqıǵa alǵashqysy emes, alaıda sońǵysy da bolmaýy múmkin. 

Osyǵan oraı «Árqaısymyz talap etetin bolsaq, ózimiz de, elimiz de damıdy. Júrgen jerińizde siz de óz quqyǵyńyzdy qorǵańyz» - dep sózin qorytyndylady bloger.