Dımash Qudaıbergenniń jankúıerleri «Slaván bazary - 2018» halyqaralyq baıqaýynda shyrqaǵan ánin efırden qıyp tastaǵan Belteleradıokompanıasyna ashyq hat joldady. Hat mazmuny ánshiniń ınstagram jelisindegi fan-paraqshasynda jarıalandy, dep habarlaıdy Qamshy.kz aqparat agenttigi.
«Qurmetti Belteleradıokompanıa @belteleradiocompany!
Dımash Kudaıbergenniń @kudaibergenov.dimash kóptegen memleketterdegi fan-klýbtarynyń ókilderi óz kýmırin XXVII «Slaván bazary» @festivalvitebsk aıasynda kórý úshin Vıtebskige arnaıy keldi. Festıváldiń ashylýy kezindegi Dımash Qudaıbergenniń óner kórsetýi úlken jetistikke ıe boldy, oǵan zalda otyrǵan kórermenderdiń barlyǵynyń kózi jetti. «Mır» memleketaralyq teleradıokompanıasy @mir24tv 13 shilde kúni taratqan konserttiń televızıalyq nusqasynan Dımash Qudaıbergenniń óner kórsetýi qıylyp tastaldy, sóıtip Táýelsiz Memleketter Dostastyǵynyń san mıllıondaǵan aýdıtorıasy qazirgi zamannyń asqan talantty ártisiniń ónerin kórý múmkindiginen aıryldy.
«Mır» memleketaralyq teleradıokompanıasy 1992 jyly TMD qatysýshy-memleketterdiń basshylarynyń kelisimine sáıkes saıası, ekonomıkalyq jáne gýmanıtarlyq yntymaqtastyq, sonymen qatar ortaq aqparattyq keńistik qalyptastyrý jáne halyqaralyq aqparat almasýǵa járdemdesý maqsatynda quryldy.
Álemde Dımash Qudaıbergenniń 40 shaqty fan-klýby jáne jalpy sany 5 mıllıonnan artyq jankúıerleri bar. Sizderge belgili, Dımash, tolyp jatqan jankúıerleri ony dál osylaı jaı ǵana atymen ataıdy, 2015 jyly «Slaván bazarynda» gran-prıdi jeńip aldy jáne festıválǵa úshinshi ret qonaq retinde qatysty. Bıyl Dımash sonymen qatar balalar baıqaýynyń ádil qazylar múshesi boldy. Festıváldiń ashylýyndaǵy onyń jarqyn óner kórsetýi jáı ǵana tabysty emes, BAQ-da úlken rezonans týdyrǵan basty oqıǵa boldy.Ár túrli tilde án aıtatyn Qazaqstannyń jas ókiliniń barlyq shyǵarmashylyǵy Otanyna degen súıispenshilik qana emes, elder arasyndaǵy halyqaralyq jáne basqa da kedergilerdi joıýǵa baǵyttalǵan, asqaq ónerdiń úlgisi bolyp tabylady. Dımash Qudaıbergenniń ónerin kórsetý arnanyń negizgi qaǵıdasy – beıbitshilik pen halyqtar arasyndaǵy dostyqty ornatý úshin elder arasynda aqparat almastyrýdy ári qaraı damytýǵa áserin tıgizetini shúbásiz edi.
Biz, Dımash Qudaıbergenniń darynyna bas ıýshiler, «Mır» TRK basshylaryna ashyq hat joldap, ne sebepti konsert qysqartylyp kórsetilgenin túsindirýdi suradyq.
Bizdiń qolymyzǵa tıgen «Mır» TRK resmı jaýabynda ashylý saltanatynyń qysqartylyp kórsetilgendigi úshin jaýakershilikti Belteleradıoǵa júktedi, óıtkeni kelisim-shart boıynsha «Mır» TRK sizderden «Slaván bazarynyń» daıyn nusqasyn alǵan eken.
Osyǵan baılanysty zańdy suraq týyndaıdy – nelikten qazaqstandyq oryndaýshy Dımashtyń jáne onyń mıllıondaǵan aýdıtorıasynyń múddesine nuqsan keltiretin, osyndaı qysqartylǵan nusqa jasalǵan jáne taratylǵan? Sizderden nemquraıly emes, tolyq qamtylǵan bilikti jaýap alamyz dep úmittenemiz.
Qurmetpen, Fan klýbtar» delingen ánshiniń fan-paraqshasyndaǵy jazbada.
Aıta keteıik, Dımash Qudaıbergen Belarýsıa tórinde «Slaván bazary - 2018» halyqaralyq festıvalinde shyrqaǵan ánderi reseılik «RTR» men «MIR» telearnasynyń efırinen alynyp tastalǵan. Mundaı jaǵdaı buǵan deıin de bolǵan. Byltyr Dımash «Slaván bazary» baıqaýyna qonaq retinde baryp, án shyrqaǵan, alaıda Dımashty efırden qıyp tastap ánshiniń tyńdarmandarynyń shambaıyna tıgen edi. Bıyl dál sondaı jaǵdaı taǵy da qaıtalanyp otyr. Bul joly tyńdarmandary únsiz qalmaýdy jón kórdi.
