Shilde sýynyń qandaı qasıeti bar?
Ýnıversıtettiń sońǵy kýrsynda oqyp júrgenimde ózim unatqan jigitke kúıeýge shyqtym. Kúıeýim ol kezde Qaraǵandyda jumys isteıtin. Oqýymdy bitirip, dıplom alǵan soń men de sonda kettim. Tuńǵysh perzentim de Qaraǵandyda ómirge keldi. Ata-anam da, ata-enem de Ońtústik Qazaqstan oblysynda turady. Ol kisiler meniń aýylǵa kelip bosanǵanymdy durys kórgen bolatyn. Biraq men kúıeýimniń janynda bolǵym kelip, Qaraǵandyda qaldym. Sóıtip qaqaǵan qańtar aıynda tuńǵyshymdy dúnıege ákeldim. Meniń bosanǵanymdy estigen anam on-shaqty kúnnen keıin keldi.
Ol kezde men perzenthanadan úıge shyǵyp qoıǵan bolatynmyn. Esh ıkemim kelmese de birnárse etip balany shomyldyryp, qundaqtap qoıǵanmyn. Anam kelgen soń ózi ákelgen besikke salyp berdi. Biraz kúnnen keıin ulymnyń eki qoltyǵynyń asty men moıny qyzaryp jaraǵa aınaldy. Dárigerge kórsetip, jazyp bergen dárisin jaqqanymyzben kete qoıǵan joq. Aýa barmaǵannan keıin qyzaryp tur ma dep oılap, shomyldyryp bolǵannan keıin qurǵatyp súrtip, biraz ýaqyt ashyp qoıamyz. Alaıda onyń da paıdasy bolmady. Kún saıyn telefon arqyly habarlasyp otyrǵan enem topyraqty ábden órtep keptirip, sony jaqsaq ketetinin aıtty. Ony da jasap kórdik. Biraq nátıjesi bolǵan joq. Sonymen ne kerek anam ekeýmiz kóptegen em túrlerin jasaǵanymyzben balanyń qyzarǵan jarasyn ketire almaı-aq qoıdyq. Bir aıdan keıin anam aýylǵa qaıtyp ketti. Al balamnyń jarasy sol kúıinshe jazylmady. Jaz shyǵa kúıeýim kezekti eńbek demalysyna shyǵyp, aýylǵa keldik. Úıge kelisimen enem balamnyń denesin ashyp kórip: «Myna balanyń denesine shilde sýyn durys tıgizbepsiń. Qoltyǵynyń asty men moıny sodan qyzaryp ketken. Beıshara balany shiritip jiberýge aınalypsyń ǵoı. Shilde sýyn alyp qalyp pa ediń?» – dep surady. Enemniń sózin túsinbegendikten: «Shilde sýy degen ne, apa?» – dep suradym. «Shilde sýy dep balany eń birinshi shomyldyrǵan sýdy aıtady. Sol sýdy balanyń denesine túgeldeı tıgizip shyǵý kerek. Eger olaı etpese, balanyń denesi osylaısha qyzaryp, ol ońaılyqpen jazylmaıdy. Shilde sýyn túgeldeı tógip tastamastan, kishileý bir ydysqa quıyp alyp qalyp, keıin qyzarǵan jerine jaqsa op-ońaı ketip qalady», – dedi. Men ondaı sýdy tógip tastaǵanymdy aıttym. Sol kúni enem kelini jaqynda bosanǵan úılerdi aralap júrip, bir kese shilde sýyn taýyp ákeldi. Sol sýmen balamnyń qyzarǵan jerlerin jýdyq. Kóp uzamaı-aq balanyń denesiniń qyzarǵan jerleri jazylyp ketti. Shilde sýynyń osyndaı qasıeti baryna sonda ǵana kózim jetti. Sondyqtan men jas kelinshekterge balany alǵash ret sýǵa túsirgende tájirıbeli, kópti kórgen analarǵa shomyldyrtqan durys eken degen keńes aıtqym keledi.
H. Sábenova, Jetisaı qalasy.
«Aýyrmańyz!» gazetinen.
