Bastyqtyń aldynda bas kıim sheshpegeni úshin Maks Boqaevqa ekinshi ret sógis jarıalady. Osyǵan deıin Qamshy.kz aqparat agenttigi bastyqtyń aldynda bas kıimin sheshpegen Maks Boqaevqa aýyr jaza qoldanylatynyn jazǵan. Talǵat Aıan Maks Boqaevqa eskertý berip, jaza qoldanatyn bolsa, onyń bostandyqqa shyǵý ýaqyty alystap, 6 aıǵa SÝS-qa qamalatynyn aıtty. Sonymen birge Maks Boqaev anasymen kezdesý turmaq taksafon arqyly da sóılese almaıdy.
Talǵat Aıan óziniń fesbýk paraqshasyna Maks Boqavqa Petropavl qalasyndaǵy ES-164/3 kolonıa ákimshiliginiń ekinshi ret sógis jarıalaǵanyn jazyp, bılikten belsendini jaıyna qaldyrýdy talap etti.
«2016 jyly jer mıtıńisin uıymdastyrǵany úshin 5 jylǵa sottalǵan Maks Boqaevqa Petropavl qalasyndaǵy ES-164/3 kolonıa ákimshiligi ekinshi ret sógis jarıalady. Kúndelikti tekserý kezinde jasaq basshysynyń aldynda bas kıimin sheshpegeni úshin. Osyndaı da bolady... Bastyq aldynda bas kıim sheshý týraly talap adamnyń ar-namysyn taptaıdy.
Sonymen qatar, bul kórineý zańsyzdyq, sebebi bas kıimin sheshý týraly mindet İİM - 20.02.2017 jylǵy N36 qupıa buıryǵynda kórsetilgen. Bul buıryqty esh jerden taba almaısyz, onyń qupıaly degen grıfy bar. Iaǵnı, qyzmetkerlerden basqa eshkim kórmegen buıryq negizinde Maksty jazalady. Sonda sottalǵandar bul buıryqpen tanysa almaıdy, biraq oryndaýǵa mindetti. Osyndaı da jaǵdaı bolady, oqyrmandar.
Qazir Makstiń advokattary KÝIS-pen sottasyp jatyr, osy qupıa buıryqty zańsyz dep taný týraly. Birinshi sot talap aryzdy qanaǵattyrmady, jaqynda Astana qalalyq sotynda apelásıalyq shaǵym qaralady. Ádildik jeńer degen úmit joq.
Bul jaǵdaıdy, eger MAI qyzmetkeri sizge aıyppul salyp, biraq jol-júrý erejesin qupıa degenimen birdeı. İİM-niń KÝIS basshysy Bazylbekov, Bas prokýror, Joǵarǵy sot basshysy zańsyzdyqtardy toqtatyp, halyq aldyndaǵy abyroılaryńdy odan saıyn túsire bermeı, onsyz da bas bostandyǵynan aıyrylǵan Maksti jaıyna qaldyryńdar», dep jazady Talǵat Aıan.
Al Talǵat Aıannyń bul jazbasyn oqyp shyqqan 2016 jyly jazasyn ótegen almatylyq turǵyn Vladımır Kozlov mundaı zań talaby joq ekenin jazǵan.
«Men bilemin, 2016 jyly mundaı tekserý erejesi bolmaǵan. Sebebi men kezinde tekseris kezinde bas kıimimdi sheshken joqpyn. Maǵan berilgen buıryqty, zań talaptaryn jatqa aıtyp berip, oryndamaǵan bolatynmyn. Bul talapty basqa adamdar oıdan shyǵarǵan. Tekserýshiler jazasyn óteýshilerden bas kıimderin sheship, ózderiniń aldynda bas ıetin malaı, qul jasaýǵa tyrysady»,— deıdi Vladımır Kozlov.
