Áleýmettik jeliniń kúshine minip turǵan kezeńi ǵoı, «Qamshy.kz», «Baıraq.kz» jáne «facebook» arqyly Almaty oblysynyń ákimi Amandyq Batalovtyń atyna jazǵan úshbý hatymyzdy da, sol máselege oraı ákimdiktiń bergen jaýabyn da, aýyl turǵyndary oqyp-bilip otyr. Alaıda ákimdiktiń edel-jedel bergen jaýabyna sógetilikterdiń kóńili tolmaǵan. «Amandyq Batalov bizdi durys túsinbepti» degen aýyl turǵyndarynyń ókpe-nazy býdý-býda qaǵaz bolyp, meniń aldymda jatyr. Ony endi jýrnalısik ólshemge salyp, sál tujyryp jibersek, bylaı bolyp shyǵady:

1. "Sógeti aýyldyq okrýgi ákimi apparatyna 2018 jyldyń shilde aıynyń 28 kúni aýyl turǵyndarynan mal sýǵarýǵa arnalǵan sý qubyrlarynyń bólshektenip shyǵarylǵany týraly aqparat tústi. Atalǵan másele boıynsha aýyldyq okrýg ákimi apparatynyń qyzmetkerleri, jergilikti ýchaskilik ınspektormen birge orynǵa shyǵyp, 800 metr sý qubyrlarynyń qazylǵandyǵyn anyqtady. Sol ýaqytta, zańsyz jasalǵan áreket boıynsha akt ázirlenip, barlyq aqparattar polısıa bólimshesine tapsyryldy. Ýaqytsha saqtaý úshin atalǵan qubyrlar aýyldyq okrýgi ákimimen alyndy, İshki ister bólimine aryz berildi» delingen oblys ákiminiń baspasóz qyzmeti bergen resmı jaýapta. Iá, negizinen solaı. Biraq bul aýyldyqtarǵa jańalyq emes qoı. Sógetilikter sol shildeniń 28-inen beri, ıaǵnı, 1,5 aıdan beri qubyr tonaýshylarǵa tosqaýyl qoıar quzyrly organ tabylmaǵanyna narazy. Sol úshin de oblys ákimi Amandyq Batalovtyń ózinen kómek surap otyr. «Ýaqytsha saqtaý úshin atalǵan qubyrlar aýyldyq okrýgi ákimimen alyndy...» degen sózdi aýyl turǵyndary qalaı túsinerin bilmeı dal. Eger joǵarydaǵy abzasty qaıta oqyp shyqsańyz, «zańsyz qazylǵan 800 metr qubyr ýaqytsha saqtaý úshin aýyldyq okýgte qaldy» degendeı maǵyna beredi. Al shyndyǵynda aýyldyq okrýgte 800 metr turmaq, synyq-súıem de qubyr qalmaǵan. Qazylǵan qubyrdyń bárin tonaýshylar áketken.

2. «Anyqtalǵan jaıt boıynsha polısıa bólimshesimen sotqa deıingi aldyn-ala tergeý jumystary júrgizildi. Alaıda, belgisiz azamattarmen qubyrlardy qaıta bólshektep alý áreketi qaıtalandy. Bul tusta aýyldyq okrýg ákimimen 2018 jyldyń 12 qyrkúıeginde ishki ister organdaryna qaıta aryz berilip, qubyrlardy qazýǵa qatysty júrgizilip jatqan jumystardy toqtatý boıynsha shara qabyldandy».

Hosh deıik, sotqa deıingi aldyn-ala tergeý júrgizilipti. Al nátıjesi qaıda? Tonaýshy kim? Ol qandaı dókeı! Aty nege atalmaıdy? Demek tergeý durys júrgizilmegen, tipti múlde júrgizilmegen. Eger shynymen de tergeý sharalary qolǵa alynsa, tonaýshynyń kim ekeni anyqtalar edi. Óıtkeni 800 metr qubyr bir qýysqa tyǵa salatyn ıne emes qoı. Onyń ústine, jer qazyp jatqan traktorshyny aýyl ákimi men ýchaskelik polıseı kórgen, sýretke túsirgen. Odan artyq ne kerek? Sol traktorshy arqyly qaltarysta turǵan dókeıdi tabý qıyn ba? Tergeý sharalary nege tap-tuınaqtaı júrgizilmegen? Bul kimniń kinási? Aýdandyq ishki ister basqarmasynyń ba, álde aýyldyń ákimine kúsh bermeı jatqan uryǵa «táıt» demegen aýdan ákiminiń be? Mine, sógetilikter oblys ákimi Amandyq Batalov osy máseleniń bárin óz qadaǵalaýyna alyp, tıisti sharalar qoldanady dep úmittengen.

3. Bul tusta aýyldyq okrýg ákimimen 2018 jyldyń 12 qyrkúıeginde ishki ister organdaryna qaıta aryz berilip, qubyrlardy qazýǵa qatysty júrgizilip jatqan jumystardy toqtatý boıynsha shara qabyldandy».
Bul qandaı shara? «Toqtaǵan» kim? Toqtatý sharasy durys pa edi, tonaýshyny ýaqytsha qamaýǵa alyp, jaýapqa tartý sharasy qoldanylýy kerek pe edi? Bizdiń hatymyz jazylǵaly beri Toryaıǵyr jazyǵyna baryp, tonalǵan qubyrdy kórgen adam bar ma ózi? Bizdiń buǵan kúmánimiz bar. Shilde aıynan beri qazyp alynǵan qubyrdyń uzyndyǵy kemi 5-6 shaqyrym. Bul – aýyl ákimdigi qyzmetkeriniń bergen málimeti. Al oblys ákiminiń baspasóz qyzmeti bergen resmı jaýapta tek shildede tonalǵan 800 metr qubyr týraly ǵana málimet bar. Sonda oblys ákimdigi Sógeti aýyldyq okrýginen, sondaǵy bebeý qaqqan jurttan aqpar almaı-aq resmı jaýap bergendi durys kórgen be?

4. «Biz tonaýshynyń tegin adam emes ekenin baıaǵyda-aq bilgenbiz. Óıtkeni bul kópe-kórneý tonaý. «Kúshtiniń arty dıirmen tartady» degen osy. Áý basta birden Elbasy Nursultan Nazarbaevtyń ózine shaǵym aıtqymyz kelgen. Biraq oblys ákimi Amandyq Batalovty attap ketkendeı bolmaıyq degenbiz. Mynadaı jaýaptan keıin oılanyp otyrmyz. Óıtkeni oblys ákimi «bul másele boıynsha myna adam aınalysady» dep naqty laýazymdy tulǵanyń (orynbasarynyń, aýdan ákiminiń, prokýrordyń t.b) atyn atamapty. Jaýabyna kóńilimiz tolmady. Sondyqtan biz muny shyǵarypsalma jaýapqa uqsatyp otyrmyz. 
Erteńge, ıaǵnı senbi, 15 qyrkúıek kúnine BAQ ókilderin shaqyrdyq. Sebebi aýylǵa kelgen orasan zıannyń mólsherin joǵarydaǵylar áli túsinbeı otyrǵan sekildi. Eger oblys ákimi adam jiberem dese, qolynan jetektep aparyp, kórseter edik» deıdi sógetilikter.

Sansyzbaı Nurbaba