Bıyl qańtarda Aqtóbe oblysynda órtenip, 52 adam ajal qushqan avtobýstyń ıesi – Qazaqstan azamaty Ózbekstanda ustalǵan dep habarlaıdy Qamshy.kz aqparat agenttigi Azattyqtyń deregin negizge ala otyryp.
Qańtardyń 18-i kúni Aqtóbe oblysy Yrǵyz aýdany aýmaǵynda jolaýshylar avtobýsynda órt shyǵyp, saldarynan Ózbekstannyń 52 azamaty mert bolǵan edi. Órtten zardap shekken bes adam tiri qalǵan. Tergeýshiler boljamy boıynsha, órttiń shyǵýyna júrgizýshilerdiń qaýipsizdik erejesin saqtamaýy sebep bolǵan.
"Bul avtobýstyń ıesi - 46 jastaǵy Qazaqstan azamaty O.M. qazaqstandyq quqyq organdaryna kelmeı, tergeýden iz jasyrǵan. Qazaqstanda oǵan Qylmystyq kodekstiń "Kólik quraldaryn sapasyz jóndeý nemese olardy tehnıkalyq aqaýlarymen paıdalanýǵa shyǵarý" týraly 348-babynyń 4-tarmaǵynda qarastyrylǵan qylmys jasaǵan degen aıyp taǵylǵan" dep habarlaǵan Tashkent qalalyq ishki ister basqarmasy Podrobno.uz saıtyna.
Halyqaralyq izdeý jarıalanǵan O.M. birlesken jedel-izdestirý sharalary barysynda qarashanyń 20-sy kúni Tashkenttiń Sergeli aýdanynda ustalyp, ony Qazaqstanǵa ekstradısıalaý máselesi sheshilgenshe qamalǵan dep habarlaıdy Ozodlık.
