Almatyda ár sala sıfrlyq formatqa kóshýdi bastap ta ketken. Ásirese, bilim jáne densaýlyq saqtaý salasyn sıfrlaý úrdisi qarqyndy júrip keledi. Sheneýnikterdiń aıtýynsha, osy eki sala sıfrlyq formatqa kósher bolsa, elde jemqorlyq azaıady.
Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev ońtústik astanadaǵy sıfrlaý úrdisiniń sátti oryndalyp jatqanyna dán rıza.
Alık Shpekbaevtyń aıtýynsha, búgingi tańda halyq úshin dep atqarylyp jatqan memlekettik qyzmettiń kólemi 5 mıllıon dollardan asqan. Al sol qyzmettiń 80 paıyzy elektrondy formatqa jumsalypty.
Ol qandaı qyzmetter?
Eń birinshiden, elektrondy kúndelik. Shpekbaevtyń málimdeýinshe, ishki jemqorlyqty joıý maqsatynda Almatyda 400 myńnan kóp oqýshy elektrondy kúndelik paıdalanady. Mundaı úrdis tek mektepterde ǵana emes, sonymen qatar balabaqshalarǵa da jetken.
Jemqorlyqqa qarsy vedomstvonyń basshysy Alık Shpekbaev Joǵarǵy oqý oryndarynyń muǵalimderiniń de nazaryn ózine aýdartty. Aıtýynsha, pedagogqa tán qasıet – aldymen adaldyq pen tártip. Bul ekeýi boıynda úndesken ustaz bilikti maman tárbıelep shyǵady.
«Jemqorlyqqa qarsy turý máselesinde sizderdiń qoldaýlaryńyzǵa muqtajbyz. Jastardy mádenıetke, jarqyn bolashaqqa, tártipke baýlıtyn da sizdersizder. Óskeleń urpaqqa adaldyq degen sózdi tereńinen uǵyndyrsaq, erteńgi kúni jemqorlyqsyz álemge aıaq basamyz degen senimim mol. Bári siz ben bizdiń qolymyzda», - dedi ustazdar qaýymyna Alık Shpekbaev.
Aıta keteıik, 2017 jyldyń 12 jeltoqsanynda Qazaqstan Respýblıkasy Úkimetiniń № 827 qaýlysymen «Sıfrlyq Qazaqstan» memlekettik baǵdarlamasy bekitilgen edi. Baǵdarlamanyń maqsaty – ár salada sıfrlyq tehnologıany paıdalaný ári ony damytý, osylaısha eldiń ekonomıkaǵa básekelestigin arttyrý ári halyqtyń ómir sapasyn arttyrý.
Taǵy bir aıta keterligi, «Sıfrlyq Qazaqstan» baǵdarlamasyn júzege asyrý Elbasy Nursultan Nazarbaevtyń «Qazaqstan-2050» strategıasyna jol ashatyn negizgi faktor retinde sanalmaq. Strategıaǵa sáıkes, 2050 jylǵa qaraı Qazaqstan básekelestigi joǵary 30 eldiń qataryna enýi tıis.
