«Aq jol» fraksıasy Eýrazıalyq ekonomıkalyq odaqta taýarlardy mindetti tańbalaý týraly zań jobasyn ratıfıkasıalaýǵa qarsy shyqty – Azat Perýashev mundaı zańdy qoldanysqa engizý kásipkerlik qyzmetke teris áser etip, taýarlar qunynyń ósýine jol beredi dep esepteıdi. Bul jóninde Parlament Májilisiniń plenarlyq otyrysynda sóılegen sózinde málimdedi dep habarlaıdy «Aq jol» QDP baspasóz qyzmeti.

Ol 2014 jyly Eýrazıalyq odaqtaǵy áriptesterimiz tańbalaý boıynsha joba ázirlep bizge usynǵanda fraksıanyń ony quptamaǵanyn, tipti qazaqstandyq kelissóz júrgizýshilerge bul máselege tyıym salýdy usynǵanyn eske salyp ótti.

«Alaıda úkimet ony júzege asyrýdy jalǵastyra berdi. Bul pılottyq jobanyń merzimi 2016 jyly aıaqtalǵan bolatyn, biraq ony oryndaýshylar nege ekeni belgisiz 2018 jylǵa deıin uzartýyn surady. Buǵan bizdiń sheneýnikter taǵy da kelisti. Saıyp kelgende, eger eksperıment sátsizdikke ushyrasa, ony dereý doǵarady. Ekinshi ret qaıtalamaıdy. Al, endi kelip qarjy mınıstrligi bizge pılottyq joba sátti ótti dep otyr. Alaıda, bul degenimiz – faktilerdi burmalaý», - dedi depýtat.

Osy oraıda, «Aq jol» partıasynyń tóraǵasy taýarlardy tańbalaýdy engizýge qarsy naqty argýmentterdi jiktep berdi.

«Birinshiden, mindetti tańbalaý men tólemderdi engizý – bul bızneske taǵy da qosymsha salyq salý degen sóz. Ony memlekettiń paıdasyna emes, jeke komersıalyq kompanıalardyń múddesi úshin engizý nıeti tańǵalarlyq dúnıe. Bir nárseni jaqsylap túsingen jón, taýardyń bir ólshemine tańbalaýdy engizbek. Iaǵnı ár shulyqtyń, jeıde men súttiń árbir qorabyn tańbalaıtyn bolady. Qarjy mınıstrligi kásipkerler úshin bir marka úsh teńgeni quraıdy deıdi, al sol bıznestiń óz esebi boıynsha – 25 teńge. Nelikten qazaqstandyqtar bul aqshany áldeqandaı bir jeke kompanıaǵa tóleýi tıis?», - degen saýal qoıdy Azat Perýashev.

«Ol halyqtyń ár kún saıyn ár túrli taýarlar satyp alatynyn jáne onyń tek bir ǵana danadan emes ekenin, soǵan sáıkes olar 25 teńgeden emes, 200-300 teńge kún saıyn tólep turatynyna» mysal keltirdi.

«Al, endi oısha sol aqsha mólsherin 18 mıllıon halyqtyń sanyna kóbeıtip kórińiz. Áńgime mıllıardtaǵan qarajatta bolyp tur. Onyń bári tańbalaýdyń (markırovka) operatory – jeke menshik kompanıalardyń qorjynyna túsedi. Demek, osynshama aýqymdy qarjy Reseıge ketedi, jobaǵa bastamashylyq etken kompanıalardyń múddesine jumys isteıdi», - dep túıindedi depýtat.