Búgin saıasatker Zamanbek Nurqadilovtiń týǵan kúni. Eger kózi tiri bolǵanda búgin 75 jasqa tolar edi. Marqum osydan 10 jyl buryn «Status guo» baǵdarlamasyna suhbat bergen. Atalmysh suhbatyn Qamshy.kz aqparat agenttigi oqyrman nazaryna usynady. 

Nurqadilov bylaı depti:

— Biz baýyrym ekeýmiz ákesiz óstik. Jalǵyz anam jumys istedi. Toqshylyqta ómir súrmedik. Anam tazalyqshy bolyp jumys istedi. Jıi aýyratyn. Biz ot jaǵý úshin tańerteń 4-5-te turatynbyz. Keıin mektepke de úlgerýimiz kerek qoı. Meniń ómirimdegi mańyzdy sátterdiń biri mektepti bitirgen soń bastaldy. Men mektepti medalmen bitirdim. Bul mektep úshin tarıhı sát bolǵanymen, men úshin bul asa mańyzdy bolmady. Men úshin ınstıtýtqa túsýim — erekshe estelikterdiń biri. "General bolýdy armandamaıtyn soldat joq" demekshi men general bolýdy armandadym. Alaıda kareramen asa aýyrǵanym joq. Adamdy synaǵyń kelse, bılik ber deýshi edi. Synaqtan ótpegen, bolmysyn bılik buzǵan adamdar kóp. Bılikti kótere almaǵan olar adam tanymastaı ózgergen.

Bılik meni buzǵan emes, eshqashan. Buza da almaıdy. Iá, talaı oqıǵanyń kýágeri boldym. Memlekettik mańyzy bar talaı sheshimderge yqpal etkenim de ras. Bura tartqan, qatelesken kezderim bolǵan. Eshqashan bıliktiń jalyna jarmasqan emespin biraq.

Meni bılikshil, kresloshyl, tym susty, tym tákappar dep sanaıtyndar bar. Tanymaǵasyn solaı oılaıdy. Solaı paıymdaıdy.

Bul ómirdegi bir aqıqat — qolyńa bılik berilse, durys paıdalanýǵa tyrys, ıgi maqsatqa jumsaýǵa umtyl. Máńgilik eshteńe joq óıtkeni. Bılik te máńgilik emes.

Quıryǵy kresloǵa jabysyp týǵan pende joq bul jalǵanda. Kreslonyń sýsymaly ekenin umytpaǵan jón. Qolyna bılik tıse, jalǵandy jalpaǵynan basqysy keletinder kóp soǵan qaramaı. Quddy qudiret qonǵandaı sezinedi ózin.

Aljasqannyń, adasqannyń belgisi bul. Adamdyqtan aınyǵannyń kórinisi. Adam degen atyn joǵaltqan, adam qalpynan ajyrap qalǵandar qanshama aramyzda…

Túptep kelgende seniń de shegiń bar, Táńir belgilep bergen. Budan asyp qaıda barasyń?

Qolyńa berilgen bılikti asyra paıdalansań, osy shekten shyqqanyń. Táńir belgilep bergen syzyqtan asqanyń. Talqanyń taýsylǵan kúni aldyńnan shyǵady…

Bılikke kelgen adam bul araǵa nege otyrǵanyn, ne maqsatpen kelgenin, qandaı is atqararyn kúni buryn bilse, mundaı adamnan qaıyr bolady.

Bılikke kelgen adam qyzmetin qý qulqynnyń qamy, jeý, jalmaý maqsatynda paıdalansa, túptiń-túbi ońbaıdy. Soryn tartady.

Mundaılar áıgili Aıaz bıdiń ósıetin umytqan. «Aıaz bı álińdi bil, qumyrsqa jolyńdy bil».

Ómirime rızamyn. Eshkimge ókpem joq. Qatelessem, aldymen ózime úńilemin. «Durys istedim be, durys sheshim qabyldadym ba?» dep…

Almatynyń ákimi boldym. Jekkórinishti jumys edi. Qyzmetten ketkesin pátersiz qaldym.

Qalanyń syrtynda dachimizde turdyq. Maqpaldyń úıine kóship barmasym belgili edi. Jańa úı saldym. Boldy. Meniń shegim osy. Budan artyqtyń keregi joq. Úıim bar, ómirim bar. Otbasym bar.

Ózimniń qarapaıym ǵana adam ekenimdi túsindim. Qanaǵat. Keregi osy eken.

Daıyndaǵan: Dýman Byqaı