«Kezekti ret las aqparattyq arandatý arqyly bizdiń saıası qarsylastarymyz jeke qatelikterin eks-prezıdent Almazbek Atambaev pen onyń jaqtastaryna qarsy paıdalanbaq. Kásibı arnaıy qyzmet qajet dep tapsa, esh qıyndyqsyz uıymdastyrýshylardy anyqtaı alady», - delingen málimdemede.

Baspasóz hatshy Qytaıǵa qarsy mıtıńterge ne Atambaevtyń, ne QSDP-nyń qatysy joq ekenin atap ótken.

Byltyr jeltoqsan aıynda Qyrǵyzstanda Qytaıdan kelgen zańsyz mıgranttarǵa qarsy, olardy elden shyǵarýdy talap etken birneshe aksıa ótken. «Kyrk choro» qozǵalysynyń músheleri eger bılik talaptaryna mán bermese, bul ispen ózimiz aınalysamyz dep málimdegen.

Sońǵy kezde áleýmettik jelilerde Qytaıdan kelip jatqan zańsyz mıgrasıany toqtatý jaıynda vıdeoúndeýler keń tarap jatyr. İİM resmı habarlama taratyp, etnıkaaralyq qaqtyǵys týǵyzyp, arandatqysy keletinder qatań jazalanady dep eskertti.

Qyrǵyzstan prezıdenti Sooronbaı Jeenbekov «bul – máseleni saıasılandyryp, qarym-qatynasty buzǵysy keletin ishki kúshtiń áreketi» degen. «Qandaı syrtqy kúsh bolýy múmkin, bilmeımin. Biraq qandaı ishki kúsh ekenin jaqsy bilemiz. Barlyǵyn jaýapqa tartamyz. Memlekette zań men bılik jumys isteıdi. Bizge eshteńeden qorqýdyń qajeti joq. Shara qoldanyp, máseleni sheshemiz», - dedi prezıdent 9 qańtarda Shý oblysy, Sokýlýk aýdany turǵyndarymen kezdesý kezinde.