«Rýhanı jańǵyrý» baǵdarlamasyn iske asyrý jónindegi Ulttyq komısıa hatshysy, QR Prezıdenti ákimshiliginiń ishki saıasat bóliminiń meńgerýshisi A.Ǵ.Balaeva qazirgi qazaq ádebıeti antologıalaryn BUU-nyń 6 tiline aýdaryp jatqan aýdarmashy, redaktorlarmen kezdesti. Kezdesýde Ulybrıtanıa, Ispanıa, Fransıa, Reseı jáne Qytaı memleketterinen kelgen aýdarmashy-ádebıetshilermen qazaq ádebıeti jınaqtaryn aýdarý barysy talqylandy.

Aıda Ǵalymqyzy qazaq ádebıetiniń úzdik úlgilerin BUU-nyń 6 tiline aýdarý bastamasy buryn-sońdy bolmaǵan erekshe joba ekendigine  toqtalyp: «Bizdiń basty mindetimiz – aýdarmanyń kórkemdik sapasy qamtamasyz etý. Biz ol úshin qajet dúnıeniń barlyǵyn istep jatyrmyz. Sondyqtan, aýdarmashylar men bizdiń avtorlardyń osyndaı kezdesýi osy mindetti oryndaýymyzǵa septigin tıgizedi degen úmittemin», - dedi. Sonymen birge, QR Prezıdenti N.Á.Nazarbaevtyń «Rýhanı jańǵyrý», «Uly dalanyń jeti qyry» maqalalarynda aıtylǵan mádenıet pen ádebıetti damytýǵa baǵyttalǵan sharalarymen tanystyryp, ony iske asyrýǵa atsalysýǵa shaqyrdy.

Qazirgi tańda antologıanyń aǵylshyn, fransýz, ıspan jáne orys tilderindegi jolma-jol aýdarma aıaqtaldy. Qytaı men arab tilderindegi jolma-jol aýdarma prosesi júrip jatyr. Aýdarmashylar men qazaqstandyq avtorlardyń mundaı kezdesýi aýdarmany túpnusqa mátinge meılinshe jaqyndatyp, onyń kórkemdik sapasyn qamtamasyz etpek.