Kópbalaly otbasynan shyqqan balalar Qazaq ulttyq qyzdar pedagogıkalyq ýnıversıtetinde júz paıyzdyq jeńildikpen bilim alatyn bolady. Bul týraly oqý ornynyń baspasóz qyzmetiniń jetekshisi Jandar Asan málimdedi dep habarlaıdy Qamshy.kz aqparat agenttigi Qazaqparatqa silteme jasap. 

Onyń aıtýynsha, Jastar jyly qarsańynda qolǵa alynǵan ıgilikti is Qyzdar ýnıversıteti men «Nur Otan» partıasy arasynda jasalǵan ózara yntymaqtastyq memorandýmy aıasynda júzege asyp otyr.

Sonymen qatar, Almaty qalasynyń ákimdigi de bastamaǵa qoldaý bildirdi.

Oqý jeńildigi kópbalaly otbasynan shyqqan, mektepte oqý úlgerimi jaqsy, halyqaralyq jáne respýblıkalyq pán olımpıadalarynyń jeńimpazdaryna beriledi.

«Búginde 3 mektep oqýshysyna Qazaq ulttyq qyzdar pedagogıkalyq ýnıversıtetinde oqý grantyn alýǵa quqyq beretin arnaıy sertıfıkat tabystaldy. Endi olar bilim men ǵylymnyń qarashańyraǵynda bilim alatyn bolady», - dedi Jandar Asan.

Sonymen qatar «Nur Otan» partıasynyń 2030 jylǵa deıingi baǵdarlamasynyń «Árbir adam úshin qoljetimdi bolashaq bilimi» atty ekinshi maqsatynda Qazaqstannyń árbir mektebinde IT-synyptaryn ashý, irgeli ǵylymdy damytý úshin jaǵdaı jasaý qajettigi, bilim berý júıesine úzdik mamandardy tartý jáne oqý prosesine sıfrlyq tehnologıalardy keńinen engizýdi júzege asyrý syndy máseleler kóterildi. Bul mindetti júzege asyrý baǵytynda Qyzdar ýnıversıtetinde birqatar jumystar qolǵa alynyp, júzege asyrylýda.

Atap aıtqanda, oqý ornynyń jas ǵalymdary robot tehnıkasy boıynsha startap jobalar jasaıdy. Ýnıversıtet bazasynda osy tarapta ǵylymı-zertteý jumystaryn júrgizýge baǵyttalǵan arnaıy seksıalyq úıirmeler qurý da kózdelip otyr. Onda ýnıversıtet ǵalymdary robot tehnıkasy boıynsha óńirdegi joǵary oqý oryndarynyń stýdentteri men mektep oqýshylaryn zamanaýı zerthanalyq jumystarǵa tartyp, olardyń ǵylymı áleýetin kótermek. Bul jerde jastardyń robot tehnıkasy boıynsha ǵylymı-tehnıkalyq shyǵarmashylyq qabiletin damytý maqsat bolyp otyr. Buǵan ýnıversıtettiń materıaldyq-tehnıkalyq bazasy tolyq múmkindik beredi. Fızıka-matematıka fakúltetiniń janyndaǵy «Robot tehnıkasy» zerthanasy Lego, Arduino jáne Raspberry robottarymen, oqý-ádistemelik jáne baǵdarlamalyq nusqaýlyqtarmen jabdyqtalǵan.

«Nur Otannyń» «Rýhanı jańǵyrý» sheńberindegi jobalarynan kitaphanalar da tys qalǵan joq, kitaphana qoryn sıfrlandyrýdy qolǵa aldy. Bul tarapta da oqý ornynyń Ǵylymı kitaphanasynda birqatar jumystar júıelenip, ádebıetter sıfrlyq formatqa kóshirilip jatyr.

Aıta ketsek, búgin elordadaǵy Táýelsizdik saraıynda Elbasy Nursultan Nazarbaevtyń tóraǵalyǵymen «Nur Otan» partıasynyń kezekti XVIII sezi ótti. Jıynda Memleket basshysy halyqty qoldaýǵa arnalǵan birshama áleýmettik bastamalardy qozǵaǵan bolatyn.

Usynǵan: Maqpal Sembaı