2025 jylǵy 9–11 qazan kúnderi Úndistannyń Mýmbaı qalasynda ótken Halyqaralyq Azıa komýnıkasıa qaýymdastyǵynyń (AMIC) 31-konferensıasynda Ál-Farabı atyndaǵy Qazaq ulttyq ýnıversıtetiniń PhD doktory, dosent Qarlyǵa Mysaeva AMIC Asia Communication Award 2025 marapatyna ıe boldy. Bul marapatqa Ortalyq Azıa óńirinen alǵash ret qazaqstandyq ǵalym ıe bolyp otyr.

AMIC – komýnıkasıa jáne jýrnalısıka salasyndaǵy Azıadaǵy eń bedeldi ǵylymı uıymdardyń biri. Jyl saıyn úzdik zertteýler men aımaqtaǵy komýnıkasıa salasynyń damýyna qosqan úlesi úshin ǵalymdar, sarapshylar jáne praktık-mamandar osy uıym tarapynan marapattalady.

Qarlyǵa Mysaeva óz alǵysynda bul jetistik tek jeke marapat emes, Qazaqstan men Ortalyq Azıadaǵy komýnıkasıa ǵylymynyń halyqaralyq deńgeıde moıyndalýy ekenin atap ótti:

«Bul qurmetti barsha qoldaý kórsetken áriptesterimmen jáne shákirtterimmen bólisemin. Aımaqtan alǵashqy laýreat bolý – úlken jaýapkershilik ári jańa múmkindikterdiń bastaýy», – dedi ol.

Konferensıaǵa Qazaqstan men Ózbekstan ǵalymdary ekinshi ret qatysyp otyr. Bul – Ortalyq Azıa men AMIC arasyndaǵy ǵylymı yntymaqtastyqtyń keńeıip, óńirlik komýnıkasıa zertteýleriniń jańa deńgeıge kóterilip kele jatqanyn kórsetedi.

Sonymen qatar, konferensıa barysynda Qarlyǵa Mysaevanyń doktoranty Dıas Azımjanov mazmundy baıandama jasap, qazaqstandyq jas ǵalymdardyń áleýetin tanytty.

AMIC konferensıasyn SNDT Women’s University uıymdastyryp, sharaǵa Azıanyń jetekshi ýnıversıtetteri men ǵylymı ortalyqtarynan zertteýshiler qatysty.

Sońǵy jyldary «Qazaqstanda ǵylym damymaı jatyr» degen pikir jıi aıtylady. Alaıda halyqaralyq deńgeıde moıyndalyp jatqan osyndaı jetistikter – otandyq ǵylymnyń áleýeti bar ekenin, qazaqstandyq zertteýshilerdiń álemdik akademıalyq qaýymdastyqta óz orny qalyptasyp kele jatqanyn aıqyn dáleldeıdi.