Almaty oblysynyń Sarqan aýdanynda zamanaýı taý-shańǵy bazasy ashyldy. Qysqy týrızmdi damytýǵa baǵyttalǵan joba bolashaqta jyl on eki aı jumys isteıtin bolady.

Aýdandaǵy alǵashqy taý-shańǵy bazasy Jońǵar Alataýy baýraıynda 20 gektar aýmaqta oryn tepti. Munda uzyndyǵy 735 metr bolatyn shańǵy trassasy jáne 120 metrlik túbıń trassasy salyndy. Eki jerde taýǵa emin-erkin kóteriletin arnaıy býgeldi qondyrǵylar bar. Odan bólek kónkımen syrǵanaıtyn muz aıdyny da paıda boldy.

Mamandardyń aıtýynsha shańǵy bazasynda oblystyq jáne respýblıkalyq qysqy sport túrlerinen jarystar uıymdastyrýǵa ábden bolady. Jańa nysandy iske qosqan ınvestor Sarqan aýdanynyń jas jetkinshekteri shańǵy teýip úırenip, shymyr bolyp ósedi degen senimde. Jerlesterine osyndaı tamasha keshendi tartý etken Mámbetáli Ateshov Terekti ózenindegi sý elektr stansıasy qurylysynan keıin paıda bolǵan sýqoımany kólge aınaldyryp, ishin balyqqa toltyryp, halyqtyń jazǵy ýaqytta da demalýyna jaǵdaı jasaýdy maqsat etip otyr. Sondaı-aq shańǵy bazasy negizinde 40 oryndyq qonaq úı salynbaq.

"Budan bylaı jerlesterimiz shańǵy tebý úshin taý izdep Shymbulaqqa sabylmaıtyn boldy",- deıdi Sarqan aýdanynyń ákimi Marat Razbekov.

Shańǵy bazasy negizinde  jaqyn mańdaǵy aýyl mektepterinde shańǵy seksıasyn ashý máseleleri de qarastyrylýda.

Belsendi demalys ornynyń saltanatty ashylýy densaýlyq festıvaline ulasty. Aýdan turǵyndary arqan tartý, qol kúrestirý, buqa tartys, gir kóterý syndy saıystarda baq synady. Ujymdar men kásiporyndar úzdik dastarhan mázirinen jarysyp, sahnada óz ónerlerin kórsetti.