"Kúrdterdiń Barbang qaýymdastyǵy" qoǵamdyq birlestiginiń ókilderi Jambyl oblysy Talas aýdany Qasqabulaq aýylynda bolǵan buzaqylyq deregine baılanysty qazaqstandyqtarǵa úndeý jasady.

11 tamyzda saǵat 1:30-da Talas aýdany polısıa bólimine Qasqabulaq aýylyndaǵy buzaqylyq áreket týraly habarlanǵan. Oblystyq polısıa departamenti qyzmetkerleri 14 adamdy ustap, qylmystyq kodekstiń 293-baby (buzaqylyq) boıynsha sotqa deıingi tergeý amaldaryn júrgizip jatyr. Áleýmettik jelide janjal qazaq-kúrd jigitteri arasynda bolǵany týraly aqparat taraǵan.

Úndeý jasaǵan birlestik ókilderi keleńsiz jaıt jekelegen adamdardyń áreketinen bolǵanyn, túsinbeýshilik lezde sheshilgenin habarlady.

"Qymbatty jerlester, qadirli qazaqstandyqtar!

Jambyl oblysy Qasqabulaq aýylynda bolǵan sońǵy kúnderdegi oqıǵa qoǵam nazaryn aýdarmaı qoımady. Medısına mekemesinde erekshe esepte turǵan eki adam arasyndaǵy turmystyq janjal túsinbeýshilikke uryndyryp, jekelegen jas balalardyń shaǵyn buzaqylyǵyna ákelip soqty.

Alaıda buzaqylar áreketiniń jaı-japsary lezde anyqtalyp, qazir tekseris júrip jatyr. Jas balalar men olardyń ata-analary bir-birinen keshirim surady.

Keı adamdardyń jańsaq derek taratyp, áleýmettik jelide túımedeıdi túıedeı etip jazýy uzaq jyldan beri qoıan-qoltyq aralasyp, birge eńbektenip, otbasylarymen dostasyp ketken adamdardy janjaldastyrý, bir-birine aıdap salý maqsatyn kózdeıdi.

Biz zábir kórsetý, tonaý, oıran salý, qazaqtardyń kúrtterge qyryn qaraıtyny týraly derekterdiń jalǵan ári arandatý ekenin málimdeımiz. Aýylda eshkim zardap shekken joq, adamdardyń múlki qıraǵan joq, eshkim eshqaıda qashpady. Bári tynysh turyp, jumys istep jatyr. Mundaı áńgimelerdi qylmystyq spekýlásıa dep tanyp, adamdardy aldaýdy toqtatýdy talap etemiz.

Biz elde beıbitshilik pen kelisim bolýy úshin bárin jasap jatyrmyz, jasaı beremiz de. Otanymyz dep sanaıtyn Qazaqstandy gúldendirý jolynda eńbektenip keldik, eńbektene beremiz de" delingen birlestik úndeýinde.