Qyzylorda, Almaty jáne Qaraǵandy oblystarynda ótken aımaqtyq konferensıalar barysynda májiliske Nur Otan-nyń partıalyq tizimine úmitkerler anyqtaldy. Sondaı-aq, oblystyq saılaýaldy baǵdarlamalary bekitilip, partıanyń XX sezine qatysý úshin delegattar saılandy.

Partıa Ortalyq apparatynyń baspasóz qyzmeti habarlaǵandaı, pikirsaıys qorytyndysy boıynsha oblystyń ókildik kvotasyna sáıkes, Májilistegi partıalyq tizimge úsh óńirden 17 adam engizildi.

Atap aıtqanda, Almaty oblysynda pikirsaıys qorytyndysy boıynsha tórt daýys basymdyqpen kópbalaly ana jáne praımerızdiń birinshi kezeńiniń jeńimpazy Álıa Ábsemetova birinshi orynǵa shyqty. Partıa Jaqtastary lıgasynyń múshesi Álıa Ábsemetovanyń partıaishilik irikteý bastalar aldynda ǵana «Nur Otan» músheligine ótkenin aıta ketken lázim.

Odan keıingi oryndarda 127 daýys jınaǵan avtojol qyzmetkeri Erjan Jasybaev pen 123 daýys jınaǵan memlekettik qyzmetshi Danıar Álimbaev keledi. Sonymen birge tizimge bilim salasynyń ókilderi Janna Telpekbaeva men Damır Dıgaı, jýrnalıs Maqpal Tájmaǵambetova, kásipker Dosan Kárimov jáne mádenıet salasynyń qyzmetkeri Konstantın Nesterov endi.

Qyzylorda oblysynda birneshe daýys sheshýshi ról atqardy. Májilistiń qyzmettegi depýtaty Balaıym Kesebaeva 114 daýys jınasa, odan keıingi «Baıqońyr» ÁKK basshysy Ǵalym Ámireevte – 110 daýys. Úshinshi oryndy 100 daýyspen jeke sektor ókili Aıda Ábıbýllaeva ıelendi. Ol úzdik úshtikke jáne tıisinshe Májiliske kandıdattar tizimine de enbeı qalǵan kásipker Asqar Mahambetovten bar-joǵy 4 daýysqa basym tústi.

Qaraǵandy oblysynda Parlament tómengi palatasynyń qyzmettegi depýtaty Gúlnar Bıjanova eń kóp daýys jınady. Ekinshi oryndy 99 daýyspen Ulytaý aýdandyq partıa fılıalynyń tóraǵasy Berik Ábdiǵalıuly ıelendi. Sonymen qatar tizimge JOO oqytýshysy Amanjol Altaı, partıanyń Qaraǵandy qalalyq fılıaly tóraǵasynyń birinshi orynbasary Iýlıa Badına, bıznes ókilderi Súıindik Asan jáne Vadım Basın kirdi.

Aıta keteıik, buǵan deıin Májilistiń partıalyq tizimine elorda, Almaty jáne Shymkent qalalarynan kandıdattar saılanǵan bolatyn. Erteń taǵy 11 óńirden úmitkerlerdiń esimderi belgili bolady. Qorytyndy tizim 25 qarashada partıanyń XX sezinde bekitiledi.

«Nur Otan» partıasy Tóraǵasynyń birinshi orynbasary Baýyrjan Baıbek qazirdiń ózinde barlyq deńgeıdegi 216 máslıhatqa 6253 adamnan turatyn partıalyq tizimder ázirlengenin atap ótken bolatyn.

Áıelderdiń úles sany 22-den 34%-ke deıin, jastar – 3,5 ese, 7-den 24%-ke deıin artty. Qazirgi qyzmet etip otyrǵan máslıhattardyń quramymen salystyrǵanda ortasha jasy 7 jasqa – 51-den 44-ke deıin jasardy.

Partıalyq tizimderdiń 24%-in qyzmettegi depýtattar quraıdy, al 76%-i – jańa tulǵalar. Sonymen qatar partıa qataryna 42 myńnan astam jańa múshe qosyldy. Olardyń 1000-nan astamy partıaishilik saılaýǵa qatysyp, árbir 3-shisi «Nur Otan»-nyń partıalyq tizimine endi.
Elektrondy daýys berý nátıjelerimen jáne kandıdattar tizimimen Primaries.kz saıtynan tanysýǵa bolady.