Fransýz prezıdentiniń qoldaýymen Fransıanyń ıadrolyq súńgýir kemesi Ońtústik Qytaı teńizinde kirdi. Bul Beıjińniń ashý-yzasyn týdyrýy jáne qytaı-fransýz qatynastaryn shıelenistirýi múmkin.

Iadrolyq súńgýir kemeniń jiberilgenin Fransıanyń qorǵanys mınıstri Florens Parlı rastady. Ol óziniń tvıtterinde "Bul kezekten tys patrúl Ońtústik Qytaı teńizinen ótýdi jańa aıaqtady" dep jazdy.

"Bizdiń fransýz áskerı-teńiz kúshterimizdiń uzaq ýaqyt boıy avstralıalyq, amerıkalyq jáne japondyq strategıalyq seriktesterimen birlesken áskerı daıyndyq qabiletiniń aıqyn dáleli" dedi ol.

Postqa teńizdegi eki kemeniń sýreti ilindi.

Ońtústik Qytaı teńizi - bul jahandyq saýdanyń negizgi jetkizilim joly jáne áleýetti energıa resýrstaryna baı.

Sarapshylardyń pikirinshe, teńiz túbinde 11 trıllıon barelge deıin munaı jáne 190 trıllıon tekshe fýt tabıǵı gaz bolýy múmkin.

Qytaı aımaqtaǵy ken oryndaryna qatysty óz talaptaryn rastaýǵa tyrysady.

Beıjiń Fılıppın, Malaızıa jáne Taıvan jaǵalaýlaryna deıingi búkil sý joly Qytaıǵa tıesili ekenin aıtady. Degenmen, 2016 jyly halyqaralyq arbıtraj soty bul talapty qabyldamady.

Aıta keteıik, buǵan deıin Ońtústik Qytaı teńizinde AQSH-Qytaı áskerı kúshteriniń betpe-bet kelýleri jıilep, shıelenistiń kúsheıip bara jatqany habarlanǵan.