"Nur Otan" partıasy "Ózgerister joly: Ár azamatqa laıyq ómir!" atty saılaýaldy baǵdarlamanyń júzege asyrylýy boıynsha naqty mysaldar keltirdi. Ár óńir, qala jáne aýdanǵa arnap qabyldanǵan 217 jol kartasy aıasynda búginde saılaýaldy ýádelerdiń respýblıkalyq deńgeıde 7%-y, al óńirlerde 5%-y oryndaldy.

Partıa baspasóz qyzmetiniń málimetinshe, óńirlerde 4,6 mln. sharshy metr turǵyn úı nemese 37,6 myń páter salyndy, sondaı-aq, 8,4 myń oryndyq 25 mektep jáne 4 myń oryndyq 66 balabaqsha, 800 kelýshige arnalǵan 9 medısınalyq nysan ashyldy. 630 mlrd teńgege ınvestısıa tartý arqyly 48 kásiporyn iske qosylyp, 107 myńnan astam adam turaqty jumys oryndaryna ornalastyryldy jáne t.b. Jalpy, bıyl respýblıkalyq deńgeıde ındıkatorlardyń 24%-yn, al óńirlik deńgeıde 20%-yn oryndaý jospalanýda.

Sonymen, saılaýaldy ýádelerdi iske asyrý aıasynda Aqtóbe oblysynda 104 aýyldyq eldimeken gazben qamtamasyz etiledi. Atap aıtqanda, Muǵaljar aýdanynyń Juryn aýylynda qurylys jumystary bastalyp ketti. Jaqynda ol jerge aýyz sý ákelindi, endi turǵyndar kógildir otynǵa qol jetkizetin bolady. Qandyaǵash-Juryn-Qarakól baǵyty boıynsha gaz qubyryn salýǵa oblystyq búdjetten 1 mlrd teńgeden astam qarajat bólindi.

Shymkentte 32 mekteptiń qurylysy bastaldy. Jańa oqý jylynda úsh aýysymda oqytatyn orta bilim berý nysandarynyń sany 14-ten 9-ǵa deıin qysqarady.

Qyzylorda oblysynda jyl sońyna deıin 5 apatty kópirdi jóndeý josparlanýda. Óńirde oblystyq mańyzy bar tas joldaǵy kópirlerdiń birine qaıta jóndeý jumystary júrgizildi. 2018 jyly kóktemgi sý tasqyny saldarynan Jalaǵash aýdanynda oblystyq mańyzy bar "Jalaǵash-Josaly" avtokólik jolyn sý basty. Jyl saıyn oblystyń Jalaǵash, Qarmaqshy, Qazaly, Aral aýdandarynyń 200 myńnan astam turǵyny oblys ortalyǵyna osy tas jol arqyly barady. Bıyl buzylǵan ýchaskelerdi qalpyna keltirýge 98,2 mln teńge bólindi, 1 km tasjol tóselip, 4 sý ótkizý qurylǵysy ornatyldy.

Almaty oblysynda partıalyq ýáde negizinde Sarybaı bı, Dolan jáne Erkin aýyldarynda úsh ambýlatorıa ashyldy.

Erkin aýylynda jalpy aýdany 1000 sharshy metrdi quraıtyn jańa eki qabatty ǵımaratta sapaly medısınalyq kómek kórsetý jáne medısınalyq qyzmetterdi alýǵa qoljetimdilikti qamtamasyz etý úshin barlyq jaǵdaılar jasalǵan. Jańa ambýlatorıada ÝDZ, EKG ótýge, sondaı-aq tis dárigeriniń qabyldaýyna kelýge múmkindik bar. Ambýlatorıa Erkin jáne Kóktal aýyldarynyń turǵyndaryn qosa alǵanda, barlyǵy 18 myń adamǵa qyzmet kórsetetin bolady.

Dolan jáne Sarybaı bı aýyldyq okrýgterinde jańa ambýlatorıalar dárigerge deıingi jáne dárigerlik qabyldaý kabınetterimen, gınekolog, tis dárigeri kabınetterimen, emshara jáne fızıoterapıalyq qabyldaý kabınetterimen, emshara bólmesimen jáne fızıoterapıalyq qabyldaý kabınetterimen jabdyqtalǵan.

Batys Qazaqstan oblysynda 2025 jylǵa deıin 8 myńǵa jýyq otbasyn turǵyn úımen qamtamasyz etý josparlanýda. Oralda 90 páterli turǵyn úı paıdalanýǵa berildi.

Odan bólek, oblystyń árbir aýdanynda jańa dene shynyqtyrý-saýyqtyrý keshenderiniń qurylysy bastaldy, onyń ekeýi Jalpaqtal jáne Podstepnoe aýyldarynda maýsym aıynyń basynda óz esikterin aıqara ashty. Onda kúres, voleıbol, fýtbol, basketbol sekildi sport túrlerine arnalǵan jattyǵý zaldary, 160 oryndyq kórermen zaly qarastyrylǵan. Nysannyń aýmaǵynda shaǵyn fýtbol jáne júgirý alańdary salyndy.