Bıyl jańa jyldy toılaý men qalany sándeýge Almaty qalasynyń ákimdigi 714 mln teńge qurtpaq. Ótken jyly osyǵan 600 mln teńge jumsaǵan.

Astana ákimdigi qalany sándeýge, muz aıdyny sıaqty shyǵyndaryn túgel esepke alǵanda 825 mln teńge bólgen eken.

Almaty qalalyq mádenıet basqarmasy qaladaǵy ár aýdandy bólek bezendirip, syrtqy dızaın qyzmetterin satyp alý boıynsha 8 habarlandyrý jarıalapty. Memlekettik satyp alýlar saıtyndaǵy derekter qalanyń árbir aýdanyna keminde 65 mln teńge bólingenin kórsetedi.

Bul qyzmetti kórsetýshi retinde tórt kompanıa tańdalǵan: «Magic Wood» JSHS, «PR – Capital Media» JK, «Expedit Group» JSHS jáne «B-Grass» JSHS. Olar ár aýdanda bıiktigi on metrlik merekelik shyrsha ornatady, ol gırlándalarmen jáne oıynshyqtarmen bezendiriledi.

Factcheck.kz redaksıasynyń zertteýinshe, bul Almaty ákimdiginiń qalany kóriktendirýge josparlaǵan barlyq shyǵyndary emes. Qalanyń bas shyrshasy turatyn Abaı alańyn jobalaýǵa taǵy 66 mln teńge, jaryqtandyrý men bezendirýge 65 mln teńge, shaǵyn sáýlet formalaryn jóndeýge 46 mln teńge bóldi.

“Halyqqa bir tıyndy artyq qımaıtyn, ne baspana, ne jer telimin qımaıtyn, aýrý balalardyń, naýqas halyqtyń emine qımaıtyn, ne kredıtin jaýyp berýge qımaıtyn júzdegen mıllıondar jylda osylaı bir shyrshamen joq bolady” dep, jýrnalıs Sáýle Ábdildahanqyzy qalaı dóp basyp aıtqan deımiz.

Ras qoı, álgi mıllıondar shashylǵan shyrshalardyń biri qulap jatyr, biri órtenip jatyr shetinen.

Ras aıtady jýrnalıs: “Daraqylyq pen jasandylyqtan, ótirik pen ponttan asa almaı qaldy bular. 30 jyldyq aýrýdan jazylý ońaı ma?”.