"Vıse-premer Qanat Bozymbaev sharyqtaý shegine jetken sý tasqynymen kúresýge Mańǵystaý, Aqtóbe oblystarynan, Astana men Almatydan taǵy 500 áskerı men qutqarýshyny BQO-ǵa jiberýdi tapsyrdy. Oralǵa TJM jáne qorǵanys mınıstrliginen 200 adam kelip, jumysqa kirisip ketti" delingen baspasóz qyzmetiniń habarlamasynda.

Bıliktiń málimeti boıynsha, qorǵanysty nyǵaıtý sharalaryna oblystan 10 myńnan astam adam jáne qaladan alty myńnan astam adam, Qazaqstannyń basqa óńirlerinen ákelingen 2 myńnan asa tehnıka jumyldyrylǵan.

"Tasqynnyń sharyqtaý shegi uzarady degen boljam bar, osyǵan baılanysty vıse-premer sý basý qaýpi bar aımaqtaǵy ózender boıyna topyraq bógetterin taǵy birneshe metrge kóterýdi tapsyrdy" delingen baspasóz habarlamasynda.

Sáýirdiń basynda úkimet eldiń batys óńirin tasqynnan qorǵaýǵa 10 myńnan astam áskerı jumyldyryldy dep habarlaǵan.

21 sáýir tańerteń Oral qalasyndaǵy Jaıyq ózeninde sý deńgeıi 8,5 metrden asty. Sonyń saldarynan ózenge jaqyn saıajaı massıvterin sý basty. Jaıyq pen Shaǵan ózenderi mańyndaǵy qalanyń shaǵyn aýdandaryna da sý jaqyndap qaldy.

Úkimettiń baspasóz qyzmeti taratqan habarǵa qaraǵanda, Bozymbaev Oraldyń perımetri boıynsha sý tasqynyna qarsy qorǵanys qurylystaryn teksergen.

"BQO aýyldyq eldi mekenderinde jaǵdaı turaqty jáne baqylaýda. Tasqyn bastalǵaly óńirdegi Jaıyq pen Shaǵan ózenderi boıynda 136 shaqyrymnan astam bóget salyndy, onyń 45 shaqyrymy Oral qalasynda" dep habarlady úkimet.

Qazaqstan úkimeti buǵan deıin Jaıyqtyń joǵarǵy bóligi jáne Saqmardan Batys Qazaqstan oblysyna sý sáýirdiń 15-inen keıin keıin keletinin aıtqan. Keıin bul boljamǵa túzetý engizilip, topan sý 20-ynan keıin keledi dep aıtyldy.