Májilis depýtaty Asqat Aımaǵambetov "Qasqa jol" YouTube arnasyna bergen suhbatynda Qazaqtanda turmystyq zorlyq-zombylyqqa qarsy qabyldanǵan zańdarǵa qatysty pikir bildirdi. 
Onyń aıtýynsha, qoǵamda bul zań aıasynda bilmestikpen jáne ádeıi de taratylǵan mıfter men feık aqparat kóp. Májilis depýtaty suhbatta onyń basty úsheýine toqtaldy. 
Birinshi mıf – zań eks-mınıstr Qýandyq Bıshimbaevtyń isinen keıin ǵana qabyldandy
Alaıda, Asqat Aımaǵambetovtyń aıtýynsha, zań jobasy bul iske deıin ázirlenip, atalǵan oqıǵaǵa deıin-aq, úkimettiń qaraýyna usynylyp qoıylǵan. "Bul másele bizdiń saılaýaldy baǵdarlamamyzda da aıtylǵan bolatyn", – dedi ol. 
Ekinshi mıf – zań tek áıelderdiń quqyǵyn qorǵaıdy
Májilis depýtaty bul aqparattyń da shyndyqqa janaspaıtynyn aıtty. 

"Bul zań erlerdiń de, jalpy Qazaqstan azamattarynyń quqyǵyn qorǵaıdy. Er adamdy er adamdy ne áıel adam áıel adamdy uryp-soqsa da, dál osy zańnyń normalary qoldanylady", – dedi Asqat Aımaǵambetov. 

Úshinshi mıf – zańda ata-anadan balany tartyp alyp qoıýǵa ruqsat beretin norma bar
Májilis depýtaty, munyń jalǵan ekenin aıtty. 

"Bul zań kerisinshe otbasy ınstıtýtyn kúsheıý baǵytynda jumys isteıdi. Biz zańǵa dástúrli otbasy qundylyqtaryn dáripteıtin prınsıpterdi engizdik. Oǵan sáıkes, otbasyn qoldaý ortalyqtary jumys isteıdi. Iaǵnı, eger otbasynda qandaı da bir áleýmettik máseleler bary anyqtalsa, oǵan aldyn ala kómek beriledi", – dep túsindirdi Asqat Aımaǵambetov. 

Onyń sózinshe, kóp adam mundaı jalǵan aqparatqa bilmestikpen senip jáne ony taratyp jatsa, belgili bir adamdar ne toptardyń múddesi aıasynda arnaıy qaýeset taratýmen shuǵyldanatyndar baryn da eskertti. 

"Zańdy alyp oqý kerek. Bárimiz oqý bilemiz. Zańdy oqıtyn bolsa, onda eshqandaı da aqylǵa syımaıtyn zań normalary joq ekenine kóz jetkizemiz", – dedi májilis depýtaty.