جاننا د، ارك
ارىلاردا كەكتى ويدان،
اعارادى قيىق اي...
«...ورتكە قارسى ءورت قويعان،
ورەڭىزدىڭ بيىگى-اي!
ءومىر ءمانى – ومىردە!
وڭگە ودان سىي كۇتپە.
سىيماي قالعان سەنىمگە،
سەرت پە، سىنىق تۇيسىك پە؟
سونىڭ جانە قۇنى وسى-اق –
ءسۇيۋ! ( ...ەمەس ءسۇيىسۋ!).
كىمگە سىيلار ءلاززات،
كۇيگەن شاشتىڭ ءيىسى؟..
كۇلەر، كۇلەر قوسىلىپ،
كۇرسىنەر دە، مۇڭدانار...
الاڭقايدا شاشىلىپ،
الاقانداي كۇل قالار.
شىداپ، شىداپ، شىدار ار،
شىڭعىرعاندا شىن، ناعىز:
كىرپىگىڭىز شىلانار،
كوزىڭىزدى جۇمباڭىز!!! »
ايتا المادى ول كۇبىرلەپ،
اقىرعى اقىل ادامعا:
– الاڭقايلار تۇبىندە،
اينالادى الاڭعا...
ۇلدارىما
ەركە ءوسسىن دەپ ەدىم،
ەركىن ءوسسىن دەپ ەدىم!
ەكەۋىڭنەن وتىنەمىن كەشىرىم،
ەرتەڭ ايتام سەبەبىن...
ەلىم دەسىن دەيتىن ەم،
ەمىرەنسىن دەيتىن ەم!
ەكەۋىڭنەن وتىنەمىن كەشىرىم،
ەرتەكشىنىڭ كەيپىمەن...
ەكشەلەنىپ بىلىممەن،
ەر بولسا دەپ جۇگىنگەم...
ەكەۋىڭنەن وتىنەمىن كەشىرىم،
ەكىجۇزدى تۇرىممەن!
...ەڭسەلەنگەن جاتىردا،
ەرتوقىمى تاقىمدا...
«ەرتەڭىمىز سونداي نۇرلى دەپ ەدىم،
ەگەمەندىك قاقىندا!
ەگەۋلى ۇشكىر نايزاسى،
ەت پەن قىمىز مايلى اسى...
ەلدىك جايلى، بىرلىك جايلى ايتقاندا،
ەكەۋىڭە ءتيسىن دەدىم پايداسى!
ەكىلەنىپ وتىرىپ،
ەكى ەزۋىم كوپىرىپ...
ەڭ ءتاتتى ءبىر ارمان جايلى سىرىم دا،
ەكەن... ەكەن وتىرىك!
ەركە وسپەگەن مەن ەدىم،
ەرتە وشكەن دە مەن ەدىم...
ەكەۋىڭنەن وتىنەمىن كەشىرىم،
ەرتەڭ ايتام سەبەبىن!
...ەندى ءقايتتىم، ولەم بە؟
ەل قاتارلى كونەم دە...
ەكى باستى سامۇرىقتىڭ شەڭگەلى،
ەكەۋىڭنىڭ توبەڭدە!
ۇلدارىما – 2
سول سەرتىم – ولگەنشە مويىندا،
سەندەردى جەتكەرۋ – پارىزىم!
...ميللياردتان اسقانى – ۋايىم با،
مەملەكەتىمىزدىڭ قارىزى؟!.
( ......................................................... ،
............................................................ .
............................................................ ،
...................................... !!!
قوعامدىق-ساياسي سانا دا،
قۇلقىننان جەڭىلدى ۇياتىم..!)
...اماندىقتارىڭنان ساداعا،
الماعان سىياقىم!!!
بايلىقتى، قىزىقتى كورمەگەن،
بارلىعىن سەندەرگە سىيلادىم!
كارتاعا سىيمايتىن جەر مەنەن
كاركاستى ءۇي دە، ءانى...
ەڭسەمدى تۇسىرمەي سوندا دا،
ەرتەڭگە ەمەكسىپ ەس، يەم...
اتاڭنان قالعانى... كەڭ دالا،
ال، مەنەن... نەسيە!
ۇلكەنىڭ قارايلاپ كىشىڭە،
ۇلگىلى، ونەرلى بولىڭدار!
دىمدانعان كوزىمنىڭ ءىشى دە...
...دومبىرا ساڭىراۋ!!!
ازا تۇتۋ
كۇن كەشۋدە قوعامدا:
ارىزى بار ايتپاعان،
قارىزى بار قايتپاعان،
ءھام ءىزى بار ادامدار!
ەكى يىقتى جۇلىپ جەپ،
مۇڭ ارقالاپ ءبىرىمىز،
قۇن ارقالاپ ءبىرىمىز،
ءبىر ورتاق ءان كۇبىرلەپ...
ءبىر اتانىڭ بالاسى،
قيىسپايتىن عۇمىردا،
سىيىسپايتىن ۇعىم بار،
ءجيى ۇستايتىن جاعاسىن!
عالامشارلىق ەندىكتە،
تاڭدانۋمەن ءتۇر ازسا،
قامدانۋمەن كۇن وزسا،
الدانۋمەن كەلدىك پە؟
سۇقتانۋمەن جۇلدىزعا،
اسىل ايدىڭ ارىنە...
وسى ويدىڭ بارىنە،
باسىبايلى قۇلمىز با؟!
سارى ورىكتەي كوگەرىپ،
سارىۋايىم، كۇدىك پەن
جولى... قايىم ۇمىتتەن،
ارىلايىق دەپ ەدىك!
شەشىلەردەي تۇيىنشەك:
ۇركىپ كەيىن جامانات،
ىركىتتەيىن اعا ما،
بۇركىتتەيىن شۇيىلسەك؟!
سىلكىنىس كەرەك، سەن، سەن بە...
اعارتۋ ءۇشىن ساناڭدى،
وڭالتۋ ءۇشىن قوعامدى،
قول ارتۋ ءۇشىن ەرتەڭگە!
حابارلامادان وقىدىق:
(مەن دە سىلكىنە المادىم...
سەن دە سىلكىنە المادىڭ...)
جەر سىلكىنىپتى... اقىرى
تريپتيح
1. كوش
قىران قۇستىڭ قۇمارىن،
قىزىلداتىپ ءيىتىپ...
شىققان كۇننىڭ شۋاعىن
شاڭىراققا ۇيىتىپ!
تاعدىرىنا جۇگىنۋ،
ءتاڭىرىنىڭ ءبىر اتى...
جۇدىرىق بوپ جۇمىلۋ،
جورتقان جۇرتتىڭ مۇراتى!
ات جالى، اتان قومىندا،
ايلى اسپان استىندا...
بوستاندىقتىڭ جولىندا،
باعلان ساۋعا، باس قۇربان!
شيىر-شيىر ىزبەنەن،
شي قابىعىن سىدىرىپ...
ەركىندىكتى ىزدەگەن،
ەل كەلەدى شۇبىرىپ!
ازىنايدى جەل ۇدەپ،
التى مالتا ءال بولىپ...
...كەرەي مەنەن جانىبەك،
كوش باسىندا سار جەلىپ!
2. قونىس
قازانىنىڭ قايناۋى،
قىزۋلى قارا قيدان-دى...
...قاراتاۋدىڭ قويناۋى،
قاپتاعان ءقوس-ۇي بولدى!
اقسارى باس اتاندى،
اتاپ باسىپ تاقىمعا...
تالاس بويى قاتارلى،
تولدى شاڭقان شاتىرعا!
...سامساپ قاتىن-قالاشى،
سارى قارىن بالاسى،
سىلق-سىلق ەتسە: ءبارى وسى –
سارىسۋدىڭ ساعاسى!
...قابىل بولعان سياقتى،
قالىڭ ەلدىڭ تىلەۋى.
تۇلىك تولدى تۇياقتى،
تۋسىراپ جاتقان شۋ ەدى!
...قاۋىمنىڭ جولى، ءجونى دە،
قۇبىلاعا بۇرىلدى.
...كەرەي مەنەن جانىبەك،
كەزەكتەسىپ جۇگىندى!
3. ەس
باتالى ەرگە ب ا ق قونار،
بىلەك ەتى بۋىلتىق...
...التىنمەنەن اپتالار،
العى كۇنگە كىم ىنتىق؟
بىرلىكتى ەلگە قۇت كەلەر،
باعامدا دا، باعالا...
كۇمىسپەنەن كۇپتەلەر،
كەلەر كۇنگە نە قالار؟
تاۋەكەلدىڭ كەزىندە،
ءتاۋبا كەرەك باستاۋعا!
...يمان، سەنىم، سەزىمگە،
يە بولار ەس بار ما؟
الىستاعى الىپپەن،
ارباسۋعا جاقىنمەن...
قاپتالداعى قاۋىپتەن،
قالقالاعان ءداتىڭ بە؟
...ەلەڭ-الاڭ ءالى دە،
ەلدىڭ باسىن قوسۋعا:
كەرەي مەنەن جانىبەك،
كۇلتوبەنىڭ باسىندا!!!
قالماحانبەت مۇقامەتقالي
پىكىر قالدىرۋ