22 ناۋرىزدا ۇلىستىڭ ۇلى كۇنى الماتى قالاسى مادەنيەت باسقارماسىنىڭ ۇيىمداستىرۋىمەن ومىربەك جولداسبەكوۆ اتىنداعى ستۋدەنتتەر سارايىندا الماتى قالاسىنىڭ 1000 جىلدىق مەرەيتويىنا ارنالعان «مىڭ جاساعان شاھار» اتتى حالىقارالىق اقىندار ايتىسى وتەدى، - دەپ حابارلايدى «قامشى» پورتالى.

ايتىسقا رۇستەم قايىرتاي، يرانعايىپ كۇزەمبايەۆ، اسپانبەك شۇعاتايەۆ، نۇرلان مۋسايەۆ، ولجاس وتار، جانسايا مۋسينا، مەيىربەك سۇلتانحان جانە رەسپۋبليكامىزدىڭ، جاقىن شەتەل ەلدەردىڭ ايتىسكەر اقىندارى قاتىسادى.

ءىس-شارا ماقساتى اۋىز ادەبيەتىنىڭ ەجەلدەن قالىپتاسقان ايتىس ونەرىنىڭ ماڭىزدىلىعىن ارتتىرۋ، ۇلتتىق قۇندىلىقتارىمىزدى ودان ءارى دارىپتەۋ.

ۇيىمداستىرۋ القاسى ايتىستىڭ 22 ناۋرىز كۇنى ساعات 15.00-دە باستالاتىنىن حابارلادى.

ايتا كەتەيىك، يۋنەسكو باس كونفەرەنسياسىنىڭ 38ء-شى سەسسياسىنىڭ شەشىمىمەن، الماتى قالاسىنىڭ 1000 جىلدىعىن مەرەكەلەۋ رەسمي تۇردە يۋنەسكو-نىڭ 2016 جىلدىڭ مەرەيتويلىق جانە اتاۋلى داتالار كۇنتىزبەسىنە ەنگىزىلگەن بولاتىن.