م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا 7، 22 ماۋسىم كۇندەرى ەۆريپيدتىڭ "مەدەيا" تراگەدياسىنىڭ تۇساۋى كەسىلمەك. بيلىك ءۇشىن ەشتەڭەدەن تارتىنبايتىن ياسون مەن ماحابباتى كوزسىز كەككە اينالعان مەدەيانىڭ ءرولىن ويناۋ ˗ ءار ونەر ادامىنىڭ ارمانداعان بيىگى. ايەل ادامنىڭ تابيعاتىنا قايشى قاتىگەزدىك پەن تاق ءۇشىن وتباسىن تارك ەتكەن ازاماتتىڭ جان-دۇنيەسىنە ءۇڭىلۋدىڭ قيىندىعى نەدە؟ ونەر شىڭىنا شىققىسى كەلەتىن ءار ارتيست ارماندايتىن رولدەردىڭ مارتەبەسى مەن ماشاقاتى قانداي؟ سۇراۋى نە بولماق؟ ادام ساناسىن سان ساققا جۇگىرتكەن وسى ساۋالداردىڭ جاۋابىن ىزدەپ، شىعارماشىلىق توپپەن تىلدەسكەن ەدىك.

الەنا قابدەشوۆا، رەجيسسەر:

"مەدەيا" تراگەدياسىن قازاقستاننىڭ ەڭبەك سىڭىرگەن قايراتكەرى ءداريا جۇسىپكە ارناپ ساحنالاماقپىن. وعان سەبەپ ت.ۋيليامستىڭ "شىنى حايۋانات" سپەكتاكلىندە اكتريسامەن تەز ءتىل تابىسىپ، سەلبەسىپ جۇمىس ىستەگەنىم دەپ ايتا الامىن. سپەكتاكلگە كەلسەك، بۇل ˗ كورەرمەن قاۋىمنىڭ قابىلداۋىنا اۋىرلاۋ، پسيحولوگيالىق سالماق سالاتىن قويىلىم. مەدەيا ˗ ءوز سۇيگەنى ءۇشىن ءبارىن تارك ەتكەن ايەل، ماحابباتتىڭ جولىندا اكە-شەشەسىن اتتاپ، اعاسىن ولتىرگەن، جوقشىلىقتىڭ تاۋقىمەتىنە توزگەن جان. "اتاڭا ىستەگەنىڭ الدىڭنان شىعادى" دەمەكشى، اتا-اناسىنىڭ باتاسىنسىز، تۋعان باۋىرىن ولىمگە قيعان مەدەيانى دا سۇيگەن جارى وزگە ايەلگە ايىرباستايدى. ياعني تاقتى اڭساعان كۇيەۋى ياسون پاتشا قىزىنىڭ وزىنە كوڭىلى جىعىلعانىن پايدالانىپ، مەدەيا مەن ەكى بالاسىن تاستاپ، بيلىككە ۇمتىلادى. ياسون ءرولىن جاس تا بولسا  بويىنداعى جالىندى، قۇلشىنىستى سەزىپ قايرات ءنابيوللاعا تاپسىردىم. جالپى، قوزعايتىن ماسەلەسى وزەكتى قويىلىم كورەرمەننىڭ كوڭىلىنەن شىعىپ، وڭ باعاسىن الادى دەپ ۇمىتتەنەمىن. 

ءداريا ءجۇسىپ، قازاقستاننىڭ ەڭبەك سىڭىرگەن قايراتكەرى:

مەدەيا ˗ الەم تەاترلارىندا كوپ ساحنالانعان تانىمال ءارى كۇردەلى شىعارما. ونى وينايتىن ءاربىر اكتريسا ءوزىنىڭ شىعارماشىلىق قارىمى مەن شەبەرلىگىنە باعا بەرىپ، جان-دۇنيەسىنە ۇڭىلەدى دەپ ويلايمىن. سەبەبى، بۇل بەينەنى ساحناعا الىپ شىعۋعا كەز كەلگەن ونەر ادامىنىڭ شاما-شارقى كەلە بەرمەيدى.  سوندىقتان "مەدەيانى تولىق زەرتتەپ ءبىلۋ مۇمكىن ەمەس، ول اكتريسامەن بىرگە وسەتىن رول" دەگىم كەلەدى. پەساعا ۇڭىلسەك، انانىڭ تاس ەمشەگىن ءجىبىتىپ، تار قۇرساعىن كەڭىتكەن باۋىر ەتى بالالارىن ءوز قولىمەن ءولتىرۋى ءبىر قاراعاندا ادام جانى تۇرشىگەرلىكتەي كورىنگەنمەن، بۇگىنگى قوعامدا ورىن الىپ وتىرعان وقيعا. سوعان قاراماستان "وسىنداي قاتىگەزدىككە بارۋعا ايەلدى كىم يتەرمەلەدى؟"، "قانداي جاعداي اسەر ەتتى؟"، "ونىڭ پسيحولوگياسىندا اۋىتقۋلار بار ما؟" دەگەن دۇنيەلەردى قاراستىرعىمىز كەلمەيدى، ونىڭ ورنىنا قورقاقتاپ، ات تونىمىزدى الا قاشامىز. بۇل ءبىزدىڭ تابيعاتىمىزعا جات دۇنيە سياقتى.  مىنە، سپەكتاكلدە وسى ساۋالدارعا جاۋاپ ىزدەي وتىرىپ، ماسەلەنىڭ سەبەبىنە كورەرمەن قاۋىممەن بىرگە ۇڭىلەمىز. 

قايرات ءنابيوللا، اكتەر:

"مەدەيا" تراگەدياسىندا ياسون ءرولىن ويناۋ ˗ ءار اكتەردىڭ ارمانى. بۇل ˗ ۇلكەن جاۋاپكەرشىلىك پەن اكتەرلىك شەبەرلىكتى تالاپ ەتەتىن بەينە. ياسوننىڭ باسىنا تۇسكەن تاۋقىمەتتى سەزىنۋ مەن ءۇشىن وتە قيىن بولدى. وسى كۇنگە دەيىن جانىم تۇرشىگەدى، كەيدە جيىركەنە قارايمىن. سوعان قاراماستان سپەكتاكلدىڭ پرەمەراسىنا دايىندالىپ جاتىرمىز. باستى ءرولدى وينايتىن د.جۇسىپپەن ارىپتەس بولۋ ˗ مەن ءۇشىن ءبىر باقىت. ال رەجيسسەرىمىز ا.قابدەشوۆامەن باسىندا تۇسىنىسە الماي، ءبىرىمىزدىڭ ويىمىزدى ەكىنشىمىز ءىلىپ اكەتىپ، وربىتە الماي جاتقان تۇستارىمىز بولدى. ءقازىر كەرىسىنشە ويىمىز دا، وينىمىز دا ءبىر جەردەن شىعادى. ياسونعا كەلسەك، ءار اكتەر ءوز كەيىپكەرىن اقتاپ الۋعا تىرىساتىنى حاق. ءبىر قاراعاندا كەيىپكەرىم ادامگەرشىلىككە جات ىستەرگە باراتىن، تاق پەن ءمانساپتىڭ سوڭىنا تۇسكەن ادام رەتىندە كورىنەدى. شىن مانىندە ءومىرى كەدەيشىلىكتىڭ قامىتىندا وتكەن، جاستايىنان قۋعىن-سۇرگىن كورگەن ادام بالا-شاعاسىنىڭ بولاشاعى ءۇشىن ءوزىنىڭ ءومىرىن باسقا ارناعا تۇسىرمەككە ءماجبۇر بولادى. ونى جارى مەدەياعا دا تۇسىندىرۋگە تىرىسىپ باعادى. ال ياسونسىز ءومىر سۇرە المايتىن مەدەيا ادام ايتقىسىز زۇلىمدىققا بارادى. نەگىزىنەن وينىمىز تولىق پىسىپ-جەتىلدى دەپ ايتا المايمىن، ءالى دە ىزدەنىس ۇستىندەمىز.  

دايىنداعان: ءمولدىر بەكجان