مامىر ايىنىڭ 27 كۇنى قازاقستان رەسپۋبليكاسىنىڭ ۇلتتىق مۋزەيىندە «National Geographicء-تىڭ» ۇزدىك 50 سۋرەتى» اتتى فوتوكورمەنىڭ اشىلۋى بولدى، - دەپ حابارلايدى Qamshy.kz Baq.kz – كە سىلتەمە جاساپ. 

كورمە «National Geographic قازاقستان» جۋرنالىنىڭ تۇساۋكەسەر ءراسىمى اياسىندا ۇيىمداستىرىلىپ، وعان قازاقستان رەسپۋبليكاسى اقپارات جانە كوممۋنيكاسيا ءمينيسترى داۋرەن ابايەۆ، «National Geographicء-تىڭ» حالىقارالىق ديرەكتورى داررەن سميت، وسى جۋرنالدىڭ ماركەتينگ ديرەكتورى اريەل دەلور، باسىلىمنىڭ قازاقستان بويىنشا ديرەكتورى ەركىن جاقىپوۆتار قاتىسىپ ءسوز سويلەدى. سونىمەن قاتار قازاقستان رەسپۋبليكاسىنىڭ پارلامەنتىنىڭ دەپۋتاتتارى قۋانىش سۇلتانوۆ، ماۋلەن اشىمبايەۆ باستاعان حالىق قالاۋلىلارى دا قاتىستى.

جيىندا ءسوز العان قازاقستان رەسپۋبليكاسى اقپارات جانە كوممۋنيكاسيا ءمينيسترى داۋرەن ابايەۆ حالىقارالىق دەڭگەيدەگى بەدەلدى باسىلىمنىڭ قازاقستاندا شىعارىلۋى ەرەكشە وقيعا دەپ اتاپ ءوتتى.

«الەمگە تانىمال باسىلىمنىڭ ءبىزدىڭ ەلگە كەلىپ، قازاق تىلدە شىعۋى وتاندىق اقپارات سالاسى ءۇشىن جىلدىڭ ەلەۋلى وقيعاسى دەپ بىلەمىن. تاسىن تۇرتسە تاريحى سويلەيتىن، التاي مەن كاسپييدىڭ اراسىنداعى ۇلان-عايىر جەرىمىزدىڭ تالايدى تامساندىراتىن تابيعاتى، مايەكتى مادەنيەتى، قايتالانباس سالت ءداستۇرى «National Geographic قازاقستان» ءۇشىن تاۋسىلماس تاقىرىپ بولارى ءسوزسىز»،- دەدى د.ابايەۆ.

«National Geographic قازاقستان» جۋرنالىنىڭ ديرەكتورى ەركىن جاقىپوۆ باسىلىمنىڭ قازاقستاندىقتار ءۇشىن ماڭىزدى ەكەندىگىنە توقتالىپ ءوتتتى. «ءبىز وسى ۋاقىتقا دەيىن جۋرنالدىڭ 5 سانىن شىعاردىق. «National Geographic قازاقستان» جۋرنالى قازاقستانعا كەلۋى ارقىلى وقىرماندار الەمدىك باسىلىم ماتەريالدارىن ءوز انا تىلىندە وقي الادى. بۇل جۋرنال ءبىزدىڭ ەلىمىز ءۇشىن دە كوپ مۇمكىندىك اشىپ بەرە الادى. ماسەلەن تاريح پەن مادەنيەتكە قاتىستى كەز-كەلگەن تاقىرىپتى عالامدىق دەڭگەيدە كوتەرىپ، تالقىلاي الامىز»، - دەدى ە.جاقىپوۆ.

سونىمەن قاتار، جۋرنالدىڭ تۇساۋكەسەرىنە ارنايى شاقىرىلعان، 1954 جىلى «National Geographic» جۋرنالىنا شىققان فازيلا جاڭالتاي اپا جيىنعا كەلگەن قاۋىمعا اق باتاسىن بەردى.

كورمەدە تالعامى جوعارى كەلۋشىلەرگە 128 جىلدىق تاريحى بار الەمدىك بەدەلدى باسىلىمنىڭ الەمدى وزگەرتكەن ەڭ ۇزدىك فوتولارى ۇسىنىلادى. وندا ستيۆ ماككارريدىڭ دۇنيەنى شارلاعان ايگىلى «اۋعان قىزى» سۋرەتىنەن باستاپ، دجەين گۋدوللدىڭ وزىندىك قولتاڭباسى بار كادرلارى، توماس ابەركرومبيدىڭ قايتالانباس مەككەنىڭ سۋرەتى قويىلىپ، «National Geographic» تاريحىنداعى باسقا دا تانىمال فوتو-تۋىندىلار پاش ەتىلەدى. بۇنىمەن قوسا، كورمەگە كەلۋشىلەر فوتو-سۋرەتتەردى تاماشالاپ قانا قويماي، كادردان تىس ورىن العان وقيعالار تۋرالى دا ءبىلىپ، ءار سۋرەتتىڭ تاريحىنا تەرەڭ ۇڭىلە الادى.

ۇيىمداستىرۋشىلاردىڭ ايتۋىنشا، مۇنداعى ءاربىر فوتو ادامعا تەرەڭ وي سالىپ، دۇنيەگە فيلوسوفيالىق كوزقاراسپەن قاراۋعا ۇندەيدى.

ەستەرىڭىزگە سالا كەتەيىك، «National Geographic قازاقستان» جۋرنالى العاش رەت ەلىمىزدە بيىلعى جىلدىڭ اقپان ايىنان باستاپ جارىققا شىعىپ كەلەدى. قازىرگى كۇنى بەدەلدى باسىلىمنىڭ انا تىلىمىزدەگى ءتورتىنشى سانى ءازىز وقىرماننىڭ قولىنا ءتيدى.