امەريكا قۇراما شتاتتارىنىڭ قازاقستانداعى ەلشىسى دجوردج كرول قازاقستاندا وتكەن رۇقسات ەتىلمەگەن ميتينگتەرگە اقش-تىڭ ەشقانداي قاتىسى جوقتىعىن مالىمدەدى، - دەپ حابارلايدى Qamshy.kz قازتاگ-قا سىلتەمە جاساپ.

«ەشقاشان بۇلاي (اقش-تىڭ قازاقستانداعى ميتينگتەرگە قاتىسى بار – رەد.) دەپ ايتۋعا بولمايدى. مەن بۇنى ەستىدىم. بۇل – ەرتەگى. ءبىزدىڭ، مەملەكەتتىك دەپارتامەنتتىڭ دە، اقش ۇكىمەتىنىڭ دە بۇعان قاتىسى جوق. بۇل قازاقستاننىڭ ىشكى شارۋاسى جانە مەن بۇعان قانداي دا ءبىر پىكىر بىلدىرگىم دە كەلمەيدى»، - دەيدى دج. كرول.

ەلشى سونىمەن قاتار، اقش-تىڭ باسقا ەلدەردە تىنىشتىق بولعانىن قالايتىنىن دا ايتقان.

«مەن ءقازىر بارلىعى تىنىش دەپ ويلايمىن. ءبىز، ارينە، بارلىق ەلدەردە، ونىڭ ىشىندە قازاقستاندا، امەريكادا، تاعى باسقا ەلدەردە تىنىشتىق بولعانىن قالايمىز»، - دەيدى ول.

بۇعان دەيىن الەۋمەتتىك جەلىلەردە جانە «ەۋرازيا» تەلەارناسىندا قازاقستانداعى جەر داۋىنا بايلانىستى نارازىلىق شارالارىنا اقش ۇكىمەتىنىڭ قاتىسى بار دەگەن ايىپتاۋلار ايتىلعان بولاتىن.