ءال-فارابي اتىنداعى قازۇۋ جانىنداعى كونفۋسيي ينستيتۋتى كىتاپحاناسى «ءال-فارابي جانە قازىرگى زامان» اتتى جۇڭگو تىلىندەگى بىرەگەي وقۋ قۇرالىمەن تولىقتى، - دەپ حابارلايدى Qamshy.kz.

قازۇۋ-دا لانچجوۋ ۋنيۆەرسيتەتىنىڭ قاتىسۋىمەن كونفۋسيي ينستيتۋتتارىنىڭ كونسۋلتاتيۆتى كەڭەسى ءوتتى. ءتورت جاقتى كونسۋلتاتيۆتى كەڭەس جينالىسىنا ءال-فارابي اتىنداعى قازۇۋ-دىڭ، لانچجوۋ ۋنيۆەرسيتەتىنىڭ، تاشكەنت مەملەكەتتىك شىعىستانۋ ينستيتۋتىنىڭ، تبيليسي بوستاندىق ۋنيۆەرسيتەتىنىڭ وكىلدەرى قاتىستى.

قازاقستان قىتايدىڭ «ءبىر ايماق – ءبىر جول» اتتى جاھاندىق جوباسىن جۇزەگە اسىرۋدا ستراتەگيالىق سەرىكتەسى. بۇل ۇدەرىسكە ۋنيۆەرسيتەتتەر دە بىلىمگە نەگىزدەلگەن جاڭا يننوۆاسيالىق ەكونوميكانىڭ دامۋ نۇكتەسى رەتىندە وزدەرىنىڭ ۇلەسىن قوسادى. ورتالىق ازيا بويىنشا جىبەك جولى ۋنيۆەرسيتەتتەرى اليانسىنىڭ حابى رەتىندەگى قىزمەتى قازۇۋ جۇمىسىنىڭ باستى باعىتى.

كونفۋسيي ينستيتۋتتارى جۇمىستارىنىڭ ماڭىزدى باعىتتارىنىڭ ءبىرى – سەرىكتەس ۋنيۆەرسيتەتتەر اراسىنداعى بايلانىستى ودان ءارى دامىتۋ جولدارىن انىقتاۋ. لانچجوۋ ۋنيۆەرسيتەتىمەن تىعىز بايلانىستىڭ ارقاسىندا بۇگىندە قازۇۋ  اكادەميالىق ۇتقىرلىق جانە قوس ديپلومدى ءبىلىم الۋ باعدارلاماسى بويىنشا ستۋدەنتتەردى دايىنداپ، عالىمدار مەن وقىتۋشىلار عىلىمي كونفەرەنسيالارعا قاتىسۋدا. سونىمەن قاتار بىرلەسكەن جوبالار دا جۇزەگە اسۋدا.

 «بۇگىن ءبىز قىتايلىق ارىپتەستەرمەن شىعىستىڭ ۇلى ويشىلى ءابۋ ناسىر ءال – فارابي مۇراسىن تاراتۋدى باستى ماقسات ەتكەن بىرلەسكەن جوبانىڭ ناتيجەسىن ۇسىنامىز. ينستيتۋتتىڭ كىتاپحانا قورى «ءال-فارابي جانە قازىرگى زامان» اتتى جۇڭگو تىلىندەگى بىرەگەي وقۋ قۇرالىمەن تولىقتى»، - دەدى قازۇۋ-دىڭ ءبىرىنشى پرورەكتورى مۇحامبەتقالي بۇركىتبايەۆ.

لانچجوۋ ۋنيۆەرسيتەتىنىڭ پرورەكتورى پان باۋ تيەن: «ءبىز عىلىمي-اعارتۋشىلىق باعىتتاعى سەرىكتەستىكتى ودان ارى دامىتۋعا جانە ەكى ەل اراسىنداعى كوپجاقتى سەرىكتەستىككە جاڭا سەرپىن بەرۋگە نيەتتىمىز» - دەپ اتاپ ءوتتى.

قازاقستان رەسپۋبليكاسىنداعى جۇڭگو ءتىلى بويىنشا جوعارى بىلىكتى ماماندار دايىنداۋدان جەتەكشى ورتالىق بولىپ تابىلاتىن قازۇۋ جانىنداعى كونفۋسيي ينستيتۋتىنىڭ تابىستى قىزمەتى – قازاق ۇلتتىق ۋنيۆەرسيتەتى مەن لانچجوۋ ۋنيۆەرسيتەتى اراسىنداعى ۇزاق جىلدىق ارىپتەستىك پەن بىرلەسكەن كۇشتىڭ ناتيجەسى. 

تاراپتار ءال-فارابي اتىنداعى قازۇۋ-دا جازعى ءتىل مەكتەبىن بىرلەسىپ ۇيىمداستىرۋ ۇسىنىسىن ءبىراۋىزدان قولدادى.