قازاق ادەبيەتىنىڭ كلاسسيك جازۋشىسى، مەملەكەتتىك سىيلىقتىڭ لاۋرەاتى سايىن مۇراتبەكوۆتىڭ تۋعانىنا 80 جىل تولۋىنا وراي تالدىقورعان قالاسىنداعى ءى. جانسۇگىروۆ اتىنداعى مادەنيەت سارايىندا «س. مۇراتبەكوۆ پروزاسى – التىن عاسىر ادەبيەتىنىڭ مارجانى» اتتى ەسكە الۋ كەشى ءوتتى. جيىنعا قازاقستان جازۋشىلار وداعىنىڭ ءتوراعاسى نۇرلان ورازالين باستاعان ءبىر توپ ادەبيەت قايراتكەرلەرى قاتىستى.

جيىن "جەتىسۋ" تەلەارناسى دايىنداعان جازۋشى تۋرالى فيلم كورسەتۋدەن باستالدى. 

مەرەيتويعا جينالعان قاۋىمدى وبلىس اكىمىنىڭ ءبىرىنشى ورىنباسارى لاززات تۇرلاشوۆ قۇتتىقتادى.

- سايىن مۇراتبەكوۆ وسى ولكەدە تۋىپ – ءوسىپ، قالىڭ قازاقتىڭ ورتاق ماقتانىشىنا اينالعان جازۋشى. ەلىن، جەرىن ءسۇيىپ، ايالاي بىلگەن ازاماتقا دەگەن حالقىنىڭ پەيىلى، ىقىلاسى ەرەكشە. بۇگىن ورتامىزدا ءوزى بولماسا دا، جازعان ەڭبەكتەرى قازاق ادەبيەتىنىڭ التىن قورىندا ساقتالىپ، جاستارعا ۇلگى-ونەگە بولىپ قالارى انىق. حالقىمىزدىڭ وشپەس ونەرىن ناسيحاتتايتىن، كەيىنگى جاستارعا تاعىلىم بولاتىن وسىنداي شارالارىمىز جالعاسا بەرسىن! اعامىزدىڭ ۇرپاقتارىنا قۇت-بەرەكە، ىرىس پەن باقىت، بارشا جەتىسۋلىقتارعا تابىس، بەرەكەلى ءومىر  تىلەيمىن! – دەدى ل. تۇرلاشوۆ ءوز سوزىندە.

مۇنان كەيىن قازاقستان جازۋشىلار وداعىنىڭ ءتوراعاسى، مەملەكەتتىك سىيلىقتىڭ يەگەرى نۇرلان ورازالين جازۋشىنىڭ بولمىسى، مىنەزى، تازالىعى، تالانتى تۋرالى ەرەكشە تەبىرەنە سويلەدى. سايىن مۇراتبەكوۆكە الدىنداعى اعا بۋىنى سالماقتى باعا بەرگەن، اڭگىمە جانرىنداعى شەبەرلىگىنە ءتانتى بولعاننان «قازاقتىڭ چەحوۆى» دەپ اتاعان ساتتەرىن دە سۇيسىنە ەسكە الىپ، قازاق پروزاسىنا قۇبىلىس بولىپ كەلگەن جازۋشىنىڭ مۇراسى ماڭگىلىك ەكەنىن قاداپ ايتتى.

سونداي-اق ەسكە الۋ كەشىندە جازۋشىلار بەكسۇلتان نۇرجەكەيەۆ، احمەتجان اشيري، كادىربەك سەگىزباي ۇلى جانە ت.ب. قالامگەرلەر ءسوز الىپ، سايىن اعانىڭ شىعارماشىلىق بەلەستەرى تۋرالى اڭگىمەلەدى.

جيىن سوڭىندا تەاترلاندىرىلعان كورىنىس ساحنالانىپ، ءسۇيىنباي اتىنداعى وبلىستىق فيلارمونيا ارتىستەرىنىڭ مەرەيتويعا ارنالعان كونسەرتى كورسەتىلدى. 

الماتى وبلىسى اكىمدىگىنىڭ رەسمي سايتى