الماتىدا «نۇرلى جول» باعدارلاماسى بويىنشا 35 جاڭا تۇرعىن ءۇي سالىنادى. جيىرما ءتورت ءۇي - مەدەۋ اۋدانىندا بوي كوتەرسە، قالعان 12 قاباتتى 11 باسپانا الاتاۋ اۋدانىندا تۇرعىزىلادى. «Alatau city» دەپ اتالاتىن كەشەننىڭ ىرگەتاسىن قالا اكىمىنىڭ ورىنباسارى سۇلتانبەك ماكەجانوۆ پەن «سامۇرىق-قازىنا» ءال-اۋقات قورىنىڭ جىلجىمايتىن مۇلىك قورى باسقارما ءتوراعاسى باۋىرجان مامىتالييەۆ قالادى.

جاڭا كەشەن ەكونوم ساناتتى 1056 پاتەردەن تۇرادى. پاتەرلەر اۋماعى 36 شارشى مەتردەن 74 شارشى مەترگە دەيىن. تۇرعىن ءۇي كەشەنىنىڭ ماڭىندا 3000 كولىككە اۆتوتۇراق پەن 450 ورىنعا بالاباقشا سالۋ دا جوسپارلانۋدا.

«ويىمىز ءبىرىنشى كەزەكتە 11 ءۇي سالۋ. ول 60 مىڭ شارشى مەتر، ونىڭ ىشىندە 1056 پاتەر بولادى. باعا جاعىنان كەلسەك، الەۋمەتتىك جوسپار بويىنشا وسى پاتەرلەردىڭ باعاسى 258 مىڭ تەڭگەدەن باستالادى. ول بۇگىنگى تاڭدا الماتى قالاسى بويىنشا تومەن باعا دەپ ەسەپتەيمىن»، - دەدى «Alatau city» قۇرىلىس كومپانياسى ديرەكتورىنىڭ ورىنباسارى اسقار التايەۆ.

قوس اۋدانداعى تۇرعىن ءۇي كەشەندەرىنىڭ قۇرىلىس جۇمىستارى 2018 جىلدىڭ ماۋسىمىندا اياقتالادى. پاتەرلەر حالىققا «سامۇرىق-قازىنا» قورى ارقىلى ۇلەستىرىلەدى. بيىل جىلجىمايتىن مۇلىك قورى تۇرعىن ءۇي قۇرىلىسىنا قايتارىمدى نەگىزدە 97 ملرد تەڭگە جۇمساعان. بۇل قارجىعا قازاقستان بويىنشا 500 مىڭ شارشى مەتردى قۇرايتىن 10 مىڭ پاتەر پايدالانۋعا بەرىلەدى.