قالا باسشىسى باۋىرجان بايبەك كەشە قالامىزداعى جاڭادان ىرگە كوتەرگەن ءبىرقاتار قۇرىلىس نىساندارىن ارالاپ شىقتى
شاھار باسشىسى ناۋرىزباي اۋدانىندا سالىنىپ جاتقان اۋداننىڭ اكىمشىلىك ورتالىعىنىڭ قۇرىلىسى مەن حقكو، اۋداندىق سوت، اۋداندىق ىشكى ىستەر باسقارماسىنىڭ جانە باسقا دا مەملەكەتتىك مەكەمەلەر ورنالاساتىن اكىمشىلىك ورتالىقتىڭ قۇرىلىس جۇمىسىنىڭ بارىسىمەن تانىستى. قۇرىلىس جۇمىستارىن جۇرگىزىپ جاتقان كومپانيالاردىڭ باسشىلارىمەن، قۇرىلىسشىلارمەن كەزدەسىپ، قۇرىلىس نىساندارىنىڭ پايدالانۋ مەرزىمىن تەزدەتۋدى تاپسىردى.
قۇرىلىسشىلار ناۋرىزباي اۋدانىنىڭ اكىمشىلىك عيماراتىنىڭ قۇرىلىسى بۇيىرتسا، كەلەر جىلدىڭ مامىر ايىندا پايدالانىلۋعا بەرىلەتىنى جونىندە مالىمدەدى. ال اۋداندىق ىشكى ىستەر باسقارماسى عيماراتىنىڭ قۇرىلىسى 2017 جىلدىڭ اقپان ايىندا تولىق اياقتالاتىندىعىن، ال سىرتقى جۇمىستارى تەزدەتىلسە، مامىر ايىندا العاشقى بولىپ قۇقىق سالاسىنىڭ قىزمەتكەرلەرى قونىس تويلارىن تويلايتىندىعىن جەتكىزدى. قۇرىلىسشىلار، سونداي-اق، قالا باسشىسىنا الداعى جىلدىڭ اقپان، ناۋرىز ايلارىندا «اقجار» ىقشاماۋدانىندا سالىنىپ جاتقان ءبىر اۋىسىمدا 500 ادام قابىلداۋعا مۇمكىندىگى بار ەمحانا مەن 1200 ورىندى مەكتەپتىڭ پايدالانىلۋعا بەرىلەتىندىگىن دە مالىمدەدى.
قالا باسشىسى باۋىرجان بايبەك قۇرىلىس كومپانيالارىنىڭ باسشىلارىنا قۇرىلىس جۇمىستارىنىڭ ساپالى جۇرگىزىلۋىن قاتاڭ تاپسىردى. قالا باسشىسى، سونداي-اق، «قارعالى» وزەنى جاعالاۋىندا جۇرگىزىلىپ جاتقان قايتا قالپىنا كەلتىرۋ جانە نىعايتۋ جۇمىستارىنىڭ دا بارىسىمەن تانىستى. قارعالى وزەنىنىڭ باسىنان باستالعان قايتا قالپىنا كەلتىرۋ جۇمىستارى جاندوسوۆ كوشەسىنە دەيىن ۇلاسىپ، جوندەۋ جۇمىستارى جالعاسۋدا. ەكى جۇمىس ىستەۋدى قالامايتىن قالا باسشىسى بۇل جەردە دە قۇرىلىس جۇمىستارىنىڭ تياناقتى دا ساپالى جۇرگىزىلۋىنە ايرىقشا ءمان بەردى.
نۇرجامال بايساقال
«الماتى اقشامى» گازەتى
