«وڭتۇستىك قازاقستان وبلىسى رەسپۋبليكاداعى اۋىل شارۋاشىلىعى سالاسىنىڭ لوكوماتيۆىنە اينالىپ كەلەدى. سوڭعى 3 جىلدا باقشا داقىلدارىنىڭ جىل سايىنعى جينالۋى 1 ملن. توننادان اسادى. رەسپۋبليكاداعى جىلىجاي شارۋاشىلىقتارىنىڭ 87℅ ءبىزدىڭ وڭىردە ورنالاسقان. وبلىس رەسپۋبليكا بويىنشا ماقتا كولەمىنىڭ 100℅، ءجۇزىم مەن باقشا داقىلدارى كولەمىنىڭ 70℅ قۇرايدى»، - دەدى وقو-نىڭ اكىمى ج.تۇيمەبايەۆ «AgriTek Shymkent’2016» V حالىقارالىق مامانداندىرىلعان اۋىل شارۋاشىلىعى كورمەسىنىڭ اشىلۋ سالتاناتىندا.

  حالىقارالىق شارادا قازاقستاننان بولەك، رەسەي، تۇركيا، گەرمانيا، يسپانيا، ۇلىبريتانيا سىندى شەتەلدىك كومپانيالار كەلۋشىلەرگە ءوز ونىمدەرىن ۇسىندى. اتاپ ايتقاندا، شاراعا قاتىسىپ جاتقان 50-دەن استام كومپانيا وكىلدەرى اۋىلشارۋاشىلىق تەحنيكاسى مەن جابدىقتارىن، قوسالقى بولشەكتەردى، سۋارۋ جانە تىڭايتۋ تەحنولوگيالارىن، جىلىجايلاردى، تۇقىمدار مەن ەكپەلەردى، تىڭايتقىشتاردى، وسىمدىكتەردى قورعاۋ قۇرالدارىن، مال شارۋاشىلىعىنا ارنالعان تەحنولوگيالاردى، ۆەتەرينارلىق تەحنولوگيالاردى وڭتۇستىكقازاقستاندىق كاسىپكەرلەرگە كەڭىنەن تانىستىردى.

كورمەنى ارالاۋ بارىسىندا وبلىس اكىمى وتاندىق تاۋاروندىرۋشىلەردىڭ ونىمدەرىنە ايرىقشا كوڭىل ءبولىپ، ونى وتكىزۋدىڭ ءتۇرلى جولدارىن قاراستىرۋ ارقىلى ساۋدا-ساتتىقتى جانداندىرۋ قاجەتتىگىن ايتتى.

جالپى، ءوڭىردىڭ اۋىل شارۋاشىلىعىنداعى جەتىستىكتەرىنە توقتالساق. بيىل ايماقتاعى وسىمدىك شارۋاشىلىعى سالاسىن ءارتاراپتاندىرۋ ناتيجەسىندە 1991 جىلمەن سالىستىرعاندا باۋ-باقشا داقىلدارىنىڭ ەگىس الاڭى 49 مىڭ گا-عا ۇلعايىپ، 59 مىڭ گا قۇرادى. ياعني، كوكونىستەر كولەمى 27 مىڭ گەكتارعا كوبەيىپ، 40،4 مىڭ گا بولدى. سونداي-اق، جەمىس-جيدەك داقىلدارى مەن ءجۇزىمنىڭ ەگىستىك الاڭى 30 مىڭ گا جەتتى.

بيىلعى ماۋسىمدا جينالعان جەمىس-جيدەك داقىلدارىنىڭ تۇسىمدىلىگى 85،0 س/گا بولسا، ءجۇزىم 100 س/گا قۇرادى. تونناعا شاقساق، جالپى جينالعان جەمىس-جيدەك كولەمى 126 مىڭ توننا، ال ءجۇزىم - 63 مىڭ.تن قۇرادى.

اگروونەركاسىپ كەشەنى ماماندارىنىڭ ءوزارا تاجىريبە الماسىپ، جاڭا تەحنولوگيالارمەن ءبولىسۋ، سونىمەن قاتار، بىرلەسكەن بيزنەس-جوبالاردى قۇرۋىن ماقسات تۇتقان كورمە 11 قاراشاعا دەيىن جالعاسادى.

ايتا كەتەيىك، وڭتۇستىك قازاقستان وبلىسىندا جۇزەگە اسىپ جاتقان «اشىق اكىمدىك» جوباسى بويىنشا مەملەكەتتىك ورگاندار وزدەرىنىڭ اتقارعان جۇمىستارىن حالىققا جەتكىزىپ، كەز-كەلگەن اقپاراتتاردىڭ قولجەتىمدىلىگىن قامتاماسىز ەتۋدە.

http://rgmedia.kz/