وڭتۇستىك قازاقستاندا اۋىل شارۋاشىلىعى قىزمەتكەرلەرىنىڭ كۇنىنە ارنالعان «التىن كۇز-2015» ءداستۇرلى مەرەكەسى اتالىپ ءوتتى. مەرەكەلىك شاراعا قاتىسقان وبلىس اكىمى بەيبىت اتامقۇلوۆ بارشا اۋىل شارۋاشىلىق ماماندارى مەن ديحانداردى قۇتتىقتاپ، اگرارلىق سالانىڭ دامۋىنا ۇلەس قوسقان ءبىرقاتار ازاماتتاردى ماراپاتتادى.

وڭىردە 772،5 مىڭ گەكتارعا اۋىل شارۋاشىلىعى داقىلدارى ەگىلدى. ال 9 ايدىڭ قورىتىندىسى بويىنشا جالپى ءونىم كولەمى 247،3 ملرد. تەڭگەنى قۇرادى. بۇل وتكەن جىلدىڭ ءتيىستى كەزەڭىمەن سالىستىرعاندا 20،2 ملرد.تەڭگەگە ارتىپ وتىر. جىل سوڭىنا دەيىن جالپى ءونىم كولەمى 350 ملرد. تەڭگەگە جەتكىزىلمەك.

ءوڭىر باسشىسى ءوز سوزىندە ايماقتىڭ اۋىل شارۋاشىلىق سالاسىن جوعارى دەڭگەيدە دامىتۋ ءۇشىن كەلەسى بەسجىلدىقتا جاڭا ساياساتقا كوشۋدى ۇسىندى. − ەڭ الدىمەن وڭىردەگى سۋارمالى جەرلەردىڭ جاعدايىن جاقسارتىپ، جاڭادان سۋارمالى جەرلەردى اينالىمعا قوسۋ، ەكىنشىدەن فەرمەرلەرگە تومەن پايىزبەن بەرىلەتىن نەسيەلەردىڭ كولەمى ارتتىرۋ. سونىمەن قاتار، وبلىس كولەمىندە ماشينا-تراكتورلىق ستانسيالار (متس) اشۋ قاجەتتىگىن، فەرمەرلەرگە عىلىمي-كونسۋلتاسيالىق قىزمەت كورسەتەتىن ورتالىقتار قۇرۋ. جانە ءار اۋداننىڭ اۋىل شارۋاشىلىعىنداعى باعىتتارى ايقىندالىپ، 2020 جىلعا دەيىنگى ناقتى ينديكاتورلار بەكىتىلمەك، − دەدى ب.اتامقۇلوۆ.

بۇگىنگى تاڭدا تامشىلاتىپ سۋارۋ تەxنولوگياسىن ەنگىزۋ 43 مىڭ گەكتارعا جەتىپ، بۇل رەسپۋبليكالىق كورسەتكىشتىڭ 72 پايىزىن قۇرادى. ال جىلىجايلاردىڭ جالپى اۋدانى 1019،2 گا جەتىپ، رەسپۋبليكالىق كورسەتكىشتىڭ 87 پايىزىن قۇراپ وتىر. وسى جىلىجايلار ەسەبىنەن بۇگىنگى كۇنگە 150 مىڭ توننا كوكونىس ءونىمى ءوندىرىلدى. ال جەمىس-كوكونىس ساقتاۋ قويمالارىنىڭ جالپى سىيىمدىلىعى 220 مىڭ توننا بولسا، بۇل ەلىمىزدەگى قويمالاردىڭ 5/1 بولىگىن قۇراپ وتىر.

سونىمەن قاتار، وبلىستا ءىرى قارا مالدىڭ سانى 859 مىڭعا، قوي مەن ەشكىلەر 4 ملن 111 مىڭعا، جىلقى 224 مىڭ، تۇيە 23،4 مىڭ بولسا، قۇس باسى 2 ملن 460 مىڭ بولىپ وتىر. جۇيەلى جۇمىستىڭ ارقاسىندا جىل باسىنان بەرى 143،1 مىڭ توننا ەت ءوندىرىلىپ، وتكەن جىلدىڭ وسى كەزەڭىمەن سالىستىرعاندا 5 پايىزعا ارتتى. ال ءسۇت ءونىمى 554،3 مىڭ تن، جۇمىرتقا 224،4 ملن دانا ءوندىرىلدى. وسى اۋىل شارۋاشىلىعى باعىتىندا ايماقتا جىل باسىنان بەرى 3397 جوبا ىسكە اسىرىلدى.

مەرەكەدە ۇزدىك اۋىل شارۋاشىلىعى ەڭبەككەرلەرى مەن اۋدان، قالالارداعى كاسىپكەرلەر جانە ب ا ق وكىلدەرى جالپى 63 سەرتيفيكات پەن 15 «العىس حات» تابىستالدى. سونداي-اق، ق ر اۋىل شارۋاشىلىعى مينيسترلىگىنىڭ ءتوس بەلگىسىمەن ماقتارال، سارىاعاش اۋداندارىنىڭ شارۋا قوجالىقتارى ناگرادتتالدى.

وقو اكىمىنىڭ باسپا ءسوز قىزمەتى