بۇگىن قازاقستان رەسپۋبليكاسىنىڭ دەموكراتيالىق جاڭارۋ كۇنى. 1991 جىلى جەلتوقساننىڭ 12-ىندە قازاقستان رەسپۋبليكاسى پرەزيدەنتى نۇرسۇلتان نازاربايەۆتىڭ «قازاقستانداعى 1986 جىلعى 17-18 جەلتوقسانداعى وقيعالارعا قاتىسقانى ءۇشىن جاۋاپتىلىققا تارتىلعان ازاماتتاردى اقتاۋ تۋرالى» جارلىعىمەن قازاقستانداعى 1986 جىلعى جەلتوقساننىڭ 17-18-ىندەگى وقيعالارعا قاتىسقانى ءۇشىن قىلمىستىق، اكىمشىلىك جانە تارتىپتىك جاۋاپقا تارتىلعان ادامدار اقتالدى دەپ جازادى baq.kz
سونىمەن قاتار اتالعان جارلىقتىڭ 4-تارماعى بويىنشا جەلتوقساننىڭ 17ء-ى - قازاقستان رەسپۋبليكاسىنىڭ دەموكراتيالىق جاڭارۋ كۇنى دەپ جاريالاندى.
سونداي-اق وسى كۇن جەلتوقسان قۇرباندارىن ەسكە الۋ كۇنى دە. بۇل كۇنى قازاق حالقىنىڭ ازاماتتىق جانە ساياسي پوزيسياسىن ايقىن اڭعارتا بىلگەن، 1986 جىلعى جەلتوقساننىڭ 17-18-ىندەگى قاندى قىرعىندا وپات بولعان جاستاردىڭ ارۋاعىنا سىيىنىپ، قۇران وقىلادى.
ەسكە سالا كەتەيىك، بۇدان 30 جىل بۇرىن 1986 جىلعى جەلتوقساننىڭ 17-19-ى ارالىعىندا الماتىدا قازاق جاستارىنىڭ كسرو بيلىگىنىڭ وتارشىلدىق، امىرشىل-اكىمشىل جۇيەسىنە قارسى نارازىلىق قيمىلدارى ورىن الدى. كوتەرىلىستىڭ باستالۋىنا ماسكەۋدەگى ورتالىقتىڭ رەسپۋبليكا حالقىنىڭ پىكىرىمەن ساناسپاستان رەسەيدىڭ ۋليانوۆ وبلىستىق پارتيا كوميتەتىنىڭ 1ء-شى حاتشىسى گ.ۆ.كولبيندى كازاقستان كومپارتياسى وك-نىڭ 1ء-شى حاتشىسى ەتىپ تاعايىنداۋى تۇرتكى بولدى.
جەلتوقساننىڭ 17ء-ى كۇنى تاڭەرتەڭگى ساعات 8-دە قالاداعى ل.ي.برەجنيەۆ اتىنداعى الاڭعا (قازىرگى رەسپۋبليكا الاڭى) ساياسي تاۋەلسىزدىكتى تالاپ ەتكەن ۇراندارمەن العاشىندا 300-دەي ادام جينالىپ، كەشكىسىن ەرەۋىلشىلەر سانى 20 مىڭعا جەتتى. كسرو-نىڭ توتاليتارلىق، وتارشىل ساياساتىنا قارسى قازاق جاستارىنىڭ ازاتتىق كۇرەسى تاريحي ماڭىزى بار ۇلكەن وقيعا بولدى.
قازاقستان توۋەلسىزدىگىن العان سوڭ جەلتوقسان كوتەرىلىسى تۋرالى شىندىق قالپىنا كەلتىرىلىپ، بۇل جونىندە «جەلتوقسان. 1986. الماتى.»، «جەلتوقسان قۇرباندارىن جوقتاۋ»، «ەر نامىسى - ەل نامىسى» جيناقتارى، ك.تابەيدىڭ «مۇزدا جانعان الاۋ»، ت.بەيىسقۇلوۆتىڭ «جەلتوقسان ىزعارى» كىتاپتارى جارىق كوردى. «اللاجار»، «قىزعىش قۇس» كينوفيلمدەرى ءتۇسىرىلدى. 2006 جىلى م.شاحانوۆتىڭ «جەلتوقسان ەپوپەياسى» اتتى كولەمدى كىتابى باسىلىپ شىقتى.