ەلباسى تاپسىرماسىنا ساي، ۇكىمەت «نۇرلى جول» ينفراقۇرىلىمدى دامىتۋدىڭ 2015-2019 جىلدارعا ارنالعان مەملەكەتتىك باعدارلاماسىن» قابىلدادى. بۇل اسا اۋقىمدى باعدارلاما ەل ەكونوميكاسىنىڭ 7 ءىرى سالاسىن قامتىپ، وعان بىرنەشە مەملەكەتتىك ورگان جاۋاپتى بولدى. ەلباسى ەڭ ءبىرىنشى كەزەكتە ەلدەگى اۆتوموبيل، تەمىرجول جانە اۋە جولدارىن دامىتۋعا باسا نازار اۋداردى.

بۇگىنگى «1 ستۋديا» توك-شوۋىندا وسى قارا جولدىڭ كۇرەتامىرى ىستەپتتى اۆتو جانە تەمىرجولداردىڭ قۇرىلىسى جانە اۋە قاتىناسى تۋرالى ايتىلدى.

ستۋديا قوناقتارى - ق ر ينۆەستيسيالار جانە دامۋ ءمينيسترى جەڭىس قاسىمبەك، ق ر پارلامەنتى ءماجىلىسىنىڭ دەپۋتاتى، ەكونوميكالىق رەفورما جانە وڭىرلىك دامۋ كوميتەتىنىڭ ءتوراعاسى نۇرتاي سابيليانوۆ، ەكونوميست-ساراپشى نايليا المۇحامەدوۆا،  ەكونوميكالىق شولۋشى ەربولات مۇحامەدجان.

 «نۇرلى جول» – مەملەكەتىمىز ءۇشىن ماڭىزدى باعدارلاما. تەك قانا تاس جول ەمەس، ونىڭ ىشىندە تەمىرجول، اۆياسيا سالالارى قامتىلعان.  باعدارلامانىڭ نەگىزگى ءۇش ماقساتى – ينفراقۇرىلىم سالۋ، ياعني، ەل وڭىرلەرىن بايلانىستىرۋ، ەكىنشىسى – ترانزيتتىك دامۋ، ءۇشىنشى ەڭ نەگىزگى ماقساتى – جاڭا جۇمىس ورىندارىن قۇرۋ. وسى باعدارلاما شەڭبەرىندە جول قۇرىلىستارىندا بۇگىنگى كۇنى 75 مىڭ ادام جۇمىس ىستەيدى. بيىل بۇل كورسەتكىش 100 مىڭنان اساتىن بولادى. 2،5 جىلدىڭ ىشىندە 1300 شاقىرىم اۆتوجول ىسكە قوسىلدى. سونىڭ ارقاسىندا وسى جىلدىڭ بەس ايىندا قىتايدان ورتالىق ازياعا جانە رەسەيگە باراتىن جۇك كولەمى ەكى ەسە ارتتى.

4400 شاقىرىم جولدا قۇرىلىس جانە رەكونسترۋكسيالاۋ جۇمىستارى ءجۇرىپ جاتىر. بۇل جۇمىستار 2017-2018 جىلدارى اياقتالادى. ال، 2020 جىلعا دەيىن جالپى 7 مىڭ شاقىرىم اۆتوجول قۇرىلىستان جانە قايتا قۇرۋدان وتەتىن بولادى»، دەيدى  باعدارلامانىڭ جۇزەگە اسىرىلۋ بارىسى تۋرالى مينيستر جەڭىس قاسىمبەك.

سونداي-اق، سالا باسشىسى جولداردا پايدالانىلعان قۇرىلىس ماتەريالدارىنىڭ 95 پايىزى وزىمىزدە شىعارىلعانىن اتاپ ءوتتى.