ماڭعىستاۋ وبلىسىندا بەينەۋدەن وزبەكستان شەكاراسىنا دەيىنگى اۆتوموبيل جولىن جاڭعىرتۋ جۇمىستارى باستالدى. كولىك ءدالىزى قۇرىق پورتىنان وزگە ەلدەرگە جۇك تاسىمالداۋعا مۇمكىندىك بەرەدى. جول قۇرىلىسىنا مەملەكەت قازىناسىنان 20 ملرد تەڭگە بولىنگەن.

«بەينەۋ-اقجىگىت-وزبەكستان شەكاراسى» تاس جولىنىڭ ۇزىندىعى 85 شاقىرىمدى قۇرايدى. ەسكى جولدى قايتا جاڭعىرتۋ جۇمىستارىنىڭ باستالۋىنا اسىرەسە بەينەۋ اۋدانىنىڭ جۇرتشىلىعى قۋاندى. سەبەبى جۇزگە تارتا جەرگىلىكتى تۇرعىن قۇرىلىس باسىندا ەڭبەك ەتەتىن بولادى.

بولات دوسوۆ، بەينەۋ اۋىلىنىڭ تۇرعىنى، اۋداندىق ءماسليحات دەپۋتاتى:

-وزبەكستانعا جول وڭتۇستىك قازاقستان وبلىسى بويىنشا سارىاعاش اۋدانىندا عانا بار ەكەن. ەندى مىنە، تاس جول، اۆتوموبيل جولى سالىناتىن بولسا، ىرگەلەس جاتقان، كورشىلەس جاتقان مەملەكەتپەن اراقاتىناس، ساۋدا-ساتتىق، ەكونوميكالىق بايلانىس دامي تۇسەتىنى انىق. سونداي-اق ءبىزدىڭ ەلدى مەكەندە كوپشىلىگى وسى كورشىلەس مەملەكەتتەن كوشىپ كەلگەنىنە بايلانىستى وزدەرىنىڭ تۋما-تۋىسقاندارىنا، اعايىندارىنا جول جاقىن بولاتىن بولدى.

ەكى ەلدى جالعايتىن كۇرە جول قۇرىلىسى كەلەر جىلى اياقتالادى. بۇل ءدالىزدىڭ ەلىمىزدىڭ ەكونوميكاسىن دامىتا تۇسۋدە ماڭىزى زور. كورشى مەملەكەتتەر اتالعان تاس جولمەن قۇرىق پورتى ارقىلى جۇك تاسىمالدايتىن بولادى. ءقازىر قازاقستاننىڭ جاڭا پورتىنان اقتاۋعا دەيىن دە اۆتوجول سالىنىپ جاتىر. قۇرىلىس اياقتالعان سوڭ قۇرىق پورتىنىڭ مۇمكىندىگى ەكى ەسەگە دەيىن ارتپاق.

ەرالى توعجانوۆ، ماڭعىستاۋ وبلىسىنىڭ اكىمى:

-اينالامىزداعى يران سياقتى مەملەكەتكە، رەسەي، بۇكىل كاۆكاز ەلدەرىنە، تۇرىكمەنستان مەملەكەتىنە، وزبەكستانعا تىكەلەي جولدار اشىلىپ، بۇكىل دۇنيە ءجۇزىنىڭ قارىم-قاتىناسىنىڭ ۇلكەن قاقپاسىنا اينالدى. ورتا ەسەپپەن ەسەپتەگەندە، 68 پايىزعا دەيىن جۇڭگو مەملەكەتىنە شىعاتىن ۇلكەن جولدىڭ تورابى بۇگىندە وسى اقتاۋ، ماڭعىستاۋ جەرى ارقىلى ءوتىپ جاتىر. ونىڭ ءبارى تاۋەلسىز قازاقستاننىڭ مۇمكىندىكتەرىنە جاتادى.

بەينەۋ اۋدانىندا جولمەن قاتار اۋىز سۋ تاپشىلىعى ماسەلەسى دە شەشىلەتىن بولدى. سارعا اۋىلىنا سۋ قۇبىرىن تارتۋ جۇمىستارى باستالدى. الداعى جىلى 200 وتباسى ءوز ۇيىنەن تازا اۋىز سۋ ىشەتىن بولادى.