باتىس قازاقستان وبلىس اكىمى التاي كولگىنوۆ اقجايىق اۋدانىنا بارعان ءىس ساپارىندا «باتىس ماركا لامب» ج ش س مەكەمەسىنە دە جولاي سوعىپ، جۇمىستىڭ جاي-كۇيىمەن تانىستى.

اقجايىق اۋدانىندا ورنالاسقان مەكەمەنىڭ جۇمىسى تۋرالى اكسيونەرلەردىڭ ءبىرى راقىمجان سماعۇل ۇلى باياندادى. ونىڭ مالىمەتىنشە، اتالعان سەرىكتەستىك يرانداعى ەت ءونىمى بويىنشا ەڭ ءىرى «سانايە» كومپانياسىمەن كەلىسىمشارت جاساسقان.

– ءدال بۇگىن 18 توننا جاڭا سويىلعان باعلان قوزى ەتىن دايىنداپ، يراننىڭ استاناسىنا جونەلتكەلى وتىرمىز. ەت ءونىمىن تيەگەن جۇك كولىكتەرى حالىقارالىق اقتاۋ اۋەجايىنا باعىت الادى. اۋەجايداعى العاشقى رەيسپەن تەگەرانعا جەتكىزىلەدى. بۇل – ءبىزدىڭ يرانعا ەتتى تۇڭعىش رەت ەكسپورتقا شىعارۋىمىز. يراندىق ارىپتەستەرىمىزبەن جاساسقان كەلىسىمشارت بويىنشا الداعى ءبىر جىل ىشىندە 1500 توننا قوزى ەتىن جەتكىزۋىمىز كەرەك. «سانايە» كومپانياسىنىڭ باسشىلىعى ەتتى اپتاسىنا ءۇش رەت جونەلتۋىمىزدى تالاپ ەتىپ وتىر. بۇعان ءبىز دە تەحنيكالىق تۇرعىدان دايىنبىز، - دەيدى راقىمجان سماعۇل ۇلى.

نەگىزىنەن حالىقارالىق نارىققا، ياعني ءونىمىنىڭ باسىم بولىگىن شەتەلگە وتكىزۋگە باعىتتالعان «باتىس ماركا لامب» بۇگىندە ەتتى تۇراقتى تۇردە رەسەيگە جەتكىزىپ وتىر. سونىمەن قاتار جۇڭگو حالىق رەسپۋبليكاسىمەن ۇزاق مەرزىمدىك كەلىسىمشارتتار جۇرگىزۋدە. مامانداردىڭ ايتۋىنشا، كۇزدىڭ العاشقى ايلارىندا اسپان استى ەلىنە ەكسپورتتاۋدى باستاپ كەتۋلەرى ابدەن ىقتيمال. بەس گەكتار اۋماقتى الىپ جاتقان وندىرىستىك كەشەندە ءبارى دە تولىعىمەن اۆتوماتتاندىرىلعان. مال سويۋ جانە ەت وڭدەۋ جەلىسىندە قوي سويۋدان باستاپ ەت وڭدەۋگە دەيىنگى جوعارى تەحنولوگيالىق تالاپتار ساقتالادى. اۋىسىمىنا 1400 باس قوي سويىلادى. دايىن ءونىم تاپسىرىس بەرۋشىگە توڭازىتىلعان توشكە نەمەسە جىلىكتەلىپ، قوراپقا سالىنعان كۇيىندە جەتكىزىلەدى. بۇگىندە مۇزداتىلعان، ياعني ابدەن قاتىرىلعان ەتتەن گورى توڭازىتىلعان ەتكە سۇرانىس جوعارى. ويتكەنى مۇنداي ەت ءوزىنىڭ پايدالى قاسيەتتەرى مەن دارۋمەندەرىن جويمايدى. وسىنداي ارتىقشىلىقتارىنا شەتەلدىكتەر قىزىعۋشىلىق تانىتىپ وتىر. سونداي-اق يراندىق كومپانيانىڭ باسشىسى حادي حادادزە ەت ءونىمىنىڭ «حالال» ستاندارتىنا ساي ءوندىرىلۋىن جەكە قاداعالاۋىنا العان.

– ەستەرىڭىزدە بولسا، بۇدان ءبىراز ۋاقىت بۇرىن يران ەلىنە ءبىر توپ دەلەگاسيا بارعان ەدىك. سول ساپارىمىزدا جوعارىدا اتالعان يراندىق بەلدى كومپانيامەن كەلىسىمگە كەلگەن بولاتىنبىز. ارينە، بۇعان ەلباسىنىڭ يرانعا بارىپ، سول ەلدىڭ باسشىلىعىمەن كەزدەسۋى، سونىڭ ناتيجەسىندە ەكى ەل اراسىنداعى قاتىناستىڭ ودان ءارى بەكۋى سەبەپ بولدى. ەكىنشى جاعىنان، بىزدەگى مال شارۋاشىلىعى جاقسى دامىعان. ەت ونىمدەرىمىز ەكولوگيالىق تازا، ساپالى. جىل بويىنا اۋقىمدى جۇمىستار اتقارىپ، ەندى العاشقى ءونىمدى جونەلتكەلى وتىرمىز. باستىسى، تۇراقتى ارىپتەستەرىمىز بار. بۇل – وڭىرىمىزدەگى شارۋا قوجالىقتارى ءۇشىن ۇلكەن مۇمكىندىك. ەندى وتاندىق ءونىمدى شەتەلدەرگە تۇراقتى ەكسپورتتاۋ ءۇشىن بارلىق ءتيىستى شارالاردى ۇيىمداستىرىپ، جان-جاقتى قولداۋ كورسەتەتىن بولامىز، – دەدى ب ا ق وكىلدەرىنە بەرگەن شاعىن سۇحباتىندا ءوڭىر باسشىسى التاي كولگىنوۆ.