الماتىدا قالا اكىمدىگى جانىنداعى مۇگەدەكتەردى الەۋمەتتىك قورعاۋ جونىندەگى ۇيلەستىرۋ كەڭەسىنىڭ وتىرىسى ءوتتى، دەپ حابارلايدى Qamshy.kz اقپارات اگەنتتىگى.

جيىن بارىسىندا حالىقتىڭ ۇتقىر توپتارىنىڭ الەۋمەتتىك جانە كولىكتىك ينفراقۇرىلىم نىساندارىنا بەيىمدەلۋ ماسەلەسى، ينكليۋزيۆتى ءبىلىم بەرۋدىڭ پروبلەماسى تالقىلاندى.

قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ايگۇل احمەتوۆا ەگەر 2016 جىلى الەۋمەتتىك قولداۋعا مۇمكىندىگى شەكتەۋلى 13 مىڭ ادام قامتىلىپ، ولارعا 2،1 ملرد. تەڭگەنىڭ كومەگى كورسەتىلسە، بيىلعى 2017 جىلى 22 مىڭنان استام ازاماتقا الەۋمەتتىك قولداۋ كورسەتۋ ءۇشىن 4،1 ملرد. تەڭگەنىڭ بولىنگەنىن ايتىپ ءوتتى.

«وتكەن جىلى ارتىعىمەن بولىنگەن قارجىنىڭ ارقاسىندا العاش رەت قوسىمشا جوعارى ساپالى تەحنيكالىق بۇيىمدار ساتىپ الىنىپ، مۇگەدەكتەرگە كورسەتىلگەن الەۋمەتتىك كومەكتىڭ اياسى ۇلعايدى. 2017 جىلى 836 مۇمكىندىگى شەكتەۋلى ادام ءۇشىن گەرمانيا مەن پولشادان قۇنى 200 ميلليون تەڭگەدەن اساتىن 958 ورىندىق-اربا ساتىپ الىندى. قۇنى 593 ملن. تەڭگە بولاتىن 2543 زاماناۋي سۋردو-تيفلوتەحنيكالىق بۇيىم ساتىپ الىنىپ، 2 مىڭنان استام ادامعا تاراتىلدى. سونىمەن قاتار باعدارلامالارمەن جانە داۋىس سينتەزىمەن جابدىقتالعان نوۋتبۋكتەر، وقۋ ماشينالارى دا الىندى. 2012 جىلدان بەرى كەزەكتە تۇرعان مۇگەدەكتەردىڭ بارلىعى قاجەتتى جابدىقتارمەن تولىق قامتىلادى»، - دەدى ايگۇل احمەتوۆا.

مامانداردىڭ ايتۋىنشا، بۇگىنگى كۇنى الماتىدا ەرەكشە كۇتىمدى قاجەت ەتەتىن 36 بالا بەس مەكتەپتە ءبىلىم السا، 17 بالدىرعان ءۇش بالاباقشادا تاربيلەنۋدە، 276 ستۋدەنت ءۇش وقۋ ورنىندا ءدارىس الۋدا. 36 مەكتەپتە مىڭنان استام بالانى قامتىعان كوررەكسيالىق - دامۋ سىنىپتارى بار، پسيحولوگيالىق- پەداگوگيكالىق كوررەكسيانىڭ 7 كابينەت جۇمىس ىستەيدى، بۇلاردا 877 بالاعا كومەك كورسەتىلدى، 5588 بالدىرعان پسيحولوگيالىق-مەديسينالىق كونسۋلتاسيادا تەكسەرۋدەن ءوتتى.

بيىل مامىردا ەرەكشە ءبىلىم بەرۋدى قاجەت ەتەتىن بالالار ءۇشىن ينكليۋزيۆتى كاسىبي ءبىلىمنىڭ رەسۋرستىق ورتالىعى اشىلدى. مۇندا جىل اياعىنا دەيىن 500 مۇگەدەك ءبىلىم الىپ شىعاتىن بولدى.

قالا اكىمى بولىنگەن قارجىنىڭ اشىقتىعى مەن تيىمدىلىگىن قامتاماسىز ەتۋدى تاپسىردى.

«ءومىر ءبىر - اق رەت بەرىلەدى، تەك ۋادە بەرۋمەن عانا شەكتەلمەي، ماسەلەنى بىردەن قولعا الىپ، بىردەن شەشۋ قاجەت»، - دەدى ب.بايبەك.