الماتى قالاسىنىڭ اكىمدىگىندە اۋىس-تۇيىستەر بولدى، دەپ حابارلايدى Qamshy.kz اقپارات اگەنتتىگى.

قالالىق اكىمدىكتىڭ باسپا ءسوز قىزمەتىنەن حابارلاعانداي، ق ر كادر ساياساتى جونىندەگى ۇلتتىق كوميسسياسىنىڭ ۇسىنىسى جانە  مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ  كەلىسىمى بويىنشا الماتىدا ءبىرقاتار كادرلىق تاعايىنداۋلار بولدى.

«الاتاۋ اۋدانىنىڭ اكىمى باعدات مانزوروۆ الماتى قالاسى مەملەكەتتىك ساۋلەت-قۇرىلىس باقىلاۋ باسقارماسىنىڭ باسشىسى قىزمەتىنە تاعايىندالدى. جەتىسۋ اۋدانىنىڭ اكىمى تالعات رازاقوۆ الماتى قالاسى مەملەكەتتىك ەڭبەك ينسپەكسياسى جانە كوشى-قون باسقارماسىنىڭ باسشىسى بولىپ تاعايىندالدى.

الماتى  اكىمى باۋىرجان بايبەك مەملەكەتتىك ساۋلەت-قۇرىلىس باقىلاۋ باسقارماسىنىڭ جاڭا  باسشىسىنىڭ  الدىنا ءپرينسيپتى جانە جۇيەلى ءىستى  تالاپ ەتەتىن ءبىرقاتار مىندەتتەر قويدى.

ياعني، قالادا سالىنىپ جاتقان بارلىق نىساندارعا جۇيەلى باقىلاۋ جۇرگىزىلۋى ءتيىس. وسى جىلدار ىشىندە كوپتەگەن تۇرعىن ءۇي كەشەندەرىنىڭ،  كوممەرسيالىق نىسانداردىڭ ءبىرقاتارى زاڭسىز سالىنعان. الماتى اكىمى قۇرىلىس جۇرگىزۋگە  ليسەنزيا بەرۋ ءىسىن رەتتەۋدى تاپسىردى. ويتكەنى، ليسەنزيا العان كەيبىر جاۋاپكەرشىلىگى تومەن  قۇرىلىسشىلار ساپاسىز  نىسان  سالادى، سالدارىنان تۇرعىنداردان كوپ شاعىمدار تۇسەدى»، - دەلىنگەن حابارلامادا. 

باسپا ءسوز قىزمەتى تاراتقان مالىمەتكە سايكەس، الماتى اكىمى مەملەكەتتىك ەڭبەك ينسپەكسياسى جانە كوشى-قون باسقارماسىنىڭ جاڭا باسشىسى الدىنا دا جاڭا مىندەتتەر بەلگىلەدى. ب.بايبەك باسقارما جۇمىسىن  تۇبەگەيلى وزگەرتۋدى،  ساراپتاما جاساۋعا باستى نازار اۋدارۋدى، ناقتىلى ماسەلەلەردى جۇيەلى شەشۋدى تاپسىردى.

ول جالاقى تولەۋدەگى قارىز ماسەلەسىن ناقتىلى شەشىپ، جۇمىستى وڭتايلاندىرۋ قاجەت ەكەنىن اتاپ ءوتتى. ەڭبەكاقى بويىنشا  قارىز بولىپ قالماۋدىڭ ءتيىمدى جولدارىن ىزدەستىرۋ كەرەكتىگىن ايتتى. زەينەتاقى تولەۋ ورتالىعىمەن، سالىق  جونىندەگى مەملەكەتتىك كىرىس دەپارتامەنتىمەن بىرىگىپ جۇمىس ىستەۋ كەرەكتىگىن  ناقتىلادى. «قازىرگى كەزدە مەملەكەتتىك ەڭبەك ينسپەكسياسى تەك  شاعىم تۇسكەن كەزدە قيمىلدايدى، مۇنداي نەمقۇرايلىققا جول بەرىلمەۋى ءتيىس»، - دەلىنگەن تاراتىلعان حابارلامادا.

الماتى  اكىمى  جاڭا باسشىنىڭ نازارىن كولەڭكەلى  ەكونوميكا ماسەلەلەرىن شەشۋگە، سونىڭ ىشىندە كولەڭكەلى جۇمىس  كۇشىنە، قۇرىلىستا ءقاۋىپسىز ەڭبەكتى قامتاماسىز  ەتۋگە اۋداردى. «زەينەتاقى قورىنا قارجى اۋدارماي، سالىق تولەمەي، كونۆەرتپەن جالاقى الاتىندار بار  ەكەنى، كاسىپورىنداردا كوپتەگەن قايعىلى جايتتاردىڭ ورىن الاتىندىعى جاسىرىن ەمەس. مىنە، وسى كەلەڭسىز جايتتاردىڭ بارلىعىنا توسقاۋىل قويىلۋى ءتيىس»، - دەپ اتاپ ءوتتى شاھار باسشىسى.