الماتىنىڭ الاتاۋ اۋدانىنداعى يندۋستريالدى ايماقتا جاڭا قۇرىلىستىڭ ىرگەتاسىن قالاۋ جۇمىستارى باستالدى. ەندى وندا جاپونيالىق «Tokyo Rope Manufacturing» ترانسۇلتتىق كورپوراسياسى ينجەنەرلىك جۇيەلەردى قورعايتىن ەكىنشى جوعارى تەحنولوگيالىق زاۋىت سالادى، دەپ حابارلايدى Qamshy.kz اقپارات اگەنتتىگى. بۇل جايىندا قالالىق اكىمدىكتىڭ باسپا ءسوز قىزمەتى مالىمدەدى.

مەتالدان جاسالعان اسا ءتوزىمدى تەمىر تورلار مەن پانەلدەر شىعاراتىن «Tokyo Rope Almaty» اتتى العاشقى زاۋىت وتكەن جىلدىڭ قاراشا ايىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ قاتىسۋىمەن اشىلعان ەدى. قالا باسشىسى باۋىرجان بايبەك بۇگىنگى كۇنى الماتىنىڭ يننوۆاسيا تارتۋعا ىڭعايلى قالاعا اينالعانىن جەتكىزدى. وعان دالەل رەتىندە قالا بويىنشا ۇستىمىزدەگى جىلى نەگىزگى كاپيتال ينۆەستيسياسىنىڭ 11%-عا، سىرتقى ينۆەستيسيانىڭ 25%-عا ارتقانىن ايتتى.

«وتكەن جىلدىڭ قاراشا ايىندا ءبىزدىڭ مەملەكەت باسشىسى مەن جاپونيا پرەمەر-مينيسترى سيندزو ابەنىڭ كەزدەسۋى بارىسىندا  تاراپتار ەكىجاقتى ىنتىماقتاستىقتى كۇشەيتۋ تۋرالى ۋاعدالاسقان  بولاتىن. وسىعان وراي، الماتىدا جاپوندىق ىسكەرلىك كلۋبى مەن جاپوندىق يندۋستريالدى پارك اشىلىپ، «Tokyo Rope Almaty» جوباسىنىڭ ەكىنشى كەزەڭى جۇزەگە اسا باستادى. جالپى، الماتىنىڭ يندۋستريالدى ايماعىندا يمپورتتى الماستىراتىن، ەكسپورتتىق ءونىمدى ۇلعايتاتىن 40  جوبا ءقازىردىڭ وزىندە قولعا الىندى»، - دەدى ب.بايبەك. 

«Tokyo Rope Manufacturing» ديرەكتورلار كەڭەسىنىڭ ءتوراعاسى شيگەتو تاناكي بۇل جاپونيادان وزگە ەلدە  بالاماسى جوق ەرەكشە كاسىپورىن ەكەنىن جەتكىزدى. يندۋستريالدى ايماقتاعى 4 گەكتار جەرگە ورنالاساتىن زاۋىتتى  ىسكە قوسۋ ءۇشىن  شەتەلدىك كومپانيا جۇمسايتىن ينۆەستيسيا كولەمى 3،6 ملرد تەڭگەنى قۇرايدى. 

«مۇندا جوعارى ساپالى مەتالل تروستار، تاۋلى جانە كارەرلى جۇمىستار ءۇشىن بولاتتان جاسالىپ، قورعاسىنمەن قاپتالعان تورلار، بۋروسۆايلىق انكەرالار جانە باسقا دا ونىمدەر شىعارىلادى. ونىمدەردە قازاقستاندىق مازمۇننىڭ ۇلەسى بولعاندىقتان وزىندىك قۇنى دا ءبىرشاما  ارزان. ءوندىرىس كولەمى بويىنشا جىلىنا 17 مىڭ توننا ءونىم شىعارىلادى. زاۋىتتى  ىسكە قوسۋ 2018 جىلعا جوسپارلانعان»، - دەدى ش. تاناكا.

«Tokyo Rope» كومپانياسىنىڭ نەگىزى وسىدان 130 جىل بۇرىن قالانعان، بولات  ارقاندار شىعارۋ بويىنشا الەمدە جەتەكشى ءرول اتقارادى، سونىمەن قاتار سەلگە، داۋىلعا، ءتۇرلى تاس كوشكىندەرىنە قارسى ءتۇراتىن نىسانداردى سالۋدى جوبالاۋمەن، مونتاجداۋمەن دە اينالىسادى. بۇگىنگى كۇنى الەمدەگى ءىرى  20 كوپىردىڭ 12ء-سى   (بوسفور بۇعازىنىڭ،سۋەس كانالىنىڭ بويىنداعى، گونكونگتەگى  الەمدەگى ەڭ ۇزىن  ستوۋنكاتەرس  كوپىرلەرى) جاپوندىق مەتالل ارقاندارىن پايدالانىپ  سالىنعان. جاپونيادا  شىعاتىن ءاربىر ءتورتىنشى  اۆتوكولىكتە «Tokyo Rope» ونىمدەرى بار.  كومپانيا جەدەل  ليفتەرگە جانە ينجەنەرلىك قورعانىسقا  قاجەت جوعارى ساپالى ونىمدەر شىعارۋمەن  دە تانىمال.