بۇگىن ق ر پرەمەر-مينيسترى باقىتجان ساعىنتايەۆتىڭ توراعالىعىمەن وتكەن ۇكىمەت وتىرىسىندا ق ر ۇلتتىق ەكونوميكا ءمينيسترى تيمۋر سۇلەيمەنوۆ «قر-داعى كەدەندىك رەتتەۋ تۋرالى» كودەكس جوباسىمەن تانىستىردى، دەپ حابارلايدى Qamshy.kz اقپارات اگەنتتىگى ۇكىمەت باسشىسىنىڭ رەسمي سايتىنا سىلتەمە جاساپ.
«سوڭعى ءۇش جىل ىشىندە ەۋرازيالىق ەكونوميكالىق كوميسسيا الاڭىندا ەاەو-نىڭ جاڭا كەدەندىك كودەكسىن قالىپتاستىرۋ بويىنشا كولەمدى جۇمىستار جۇرگىزىلگەن، ول ءقازىر راتيفيكاسيالاۋ راسىمىنەن وتكىزىلىپ جاتىر»، - دەدى ت. سۇلەيمەنوۆ.
جاڭا وداقتىق كودەكس ايتارلىقتاي قايتا وڭدەلدى، كەدەندىك رەتتەۋدىڭ نەگىزگى تاسىلدەرى قايتا قارالدى. وسىعان وراي قولدانىستاعى ۇلتتىق كەدەندىك زاڭنامانى جاڭا كەدەندىك ەرەجەلەرگە سايكەستەندىرۋ ماسەلەسى كوتەرىلدى. سەگىز ايلىق جۇمىستىڭ قورىتىندىسى – كەدەن كودەكسىنىڭ جاڭا جوباسى بولدى.
جاڭا كەدەن كودەكسىنىڭ قولدانىستاعى كەدەن زاڭناماسىنان باستى ايىرماشىلىعى – كەدەندىك رەتتەۋدىڭ جاڭا ءتاسىلى. جاڭا رەتتەۋدىڭ نەگىزگى قاعيداسى – كەدەندە بيزنەس ۇدەرىستەردى اۆتوماتتاندىرۋ.
اقپاراتتىق تەحنولوگيالارعا باسىمدىق بەرۋدەن وزگە، كودەكستە سىرتقى ەكونوميكالىق قىزمەت قاتىسۋشىلارى ءۇشىن وزدەرىنىڭ شىعىندارىن وڭتايلاندىرۋعا جول اشاتىن ءبىرقاتار مۇمكىندىكتەر پايدا بولدى.
ينۆەستورلارعا كەدەندىك دەكلاراسيانى تاپسىرعانعا دەيىن تاۋارلاردى شىعارۋ مۇمكىندىكتەرى كەڭەيتىلدى. ينۆەستيسيالىق جوبالاردى ىسكە اسىرۋ اياسىندا ينۆەستورلار كەلەسى ايدىڭ 10-ى كۇنىنەن كەشىكتىرمەي، دەكلاراسيانى تاپسىرۋ تۋرالى ءوتىنىش نەگىزىندە تاۋارلاردى وزدەرىمەن الىپ كەتە الادى. سونداي-اق، ەندىگى اتالعان نورماعا ەركىن قويما، ەركىن كەدەندىك ايماق، قايتا وڭدەۋدىڭ كەدەندىك راسىمدەرى دە باعىنادى.
بۇدان وزگە، ق ر كەدەن كودەكسىنىڭ ءبىرقاتار ەرەجەسى ق ر سالىق كودەكسىنىڭ پروسەستەرىمەن ۇيلەستىرىلگەن. بۇل كەدەن باجىن، سالىقتاردى ەسەپكە الۋ، ەسەپتەۋ (قايتارۋ) بويىنشا ەرەجەلەرگە، سونىمەن قاتار بەرەشەكتى ءوندىرىپ الۋ جانە بۇزۋشىلىقتاردى جويۋ مەن تەكسەرىس ناتيجەلەرى تۋرالى حابارلامالارعا شاعىم ءتۇسىرۋ ەرەجەلەرىنە قاتىستى.
جاڭا كودەكسپەن ءبىر ۋاقىتتا وعان ىلەسپەلى زاڭ جوباسى ازىرلەندى، ول ءبىرقاتار كودەكستەر مەن زاڭدارعا وزگەرىستەر ەنگىزۋدى قاراستىرادى.
بۇدان وزگە، تاۋارلاردى جويۋدىڭ كەدەندىك راسىمىنە ورنالاستىرعان جاعدايدا مەملەكەتتىك ەكولوگيالىق ساراپتامانى بەرۋ تۇرعىسىنان ق ر ەكولوگيالىق كودەكسىنە وزگەرىستەر ەنگىزىلىپ جاتىر. بيۋدجەتتىك كودەكسكە اۆانستىق تولەمدەر نورمالارىن رەتتەۋ تۇرعىسىنان تۇزەتۋلەر ەنگىزىلۋدە. سونىمەن قاتار كولىك باقىلاۋ فۋنكسيالارىن وتكىزۋ جانە ت. ب. تۇرعىسىنان كەيبىر زاڭدارعا تۇزەتۋلەر ەنگىزىلىپ جاتىر.
«وسىلايشا، جاڭا كەدەن كودەكسى قازاقستانعا ترانزيتتىك جانە ەكسپورتتىق الەۋەتتى پايدالانۋعا مۇمكىندىك بەرەتىنىن، سىرتقى ەكونوميكالىق قىزمەتتى جۇرگىزۋدى جەڭىلدەتەتىنىن سەنىمدى تۇردە ايتۋعا بولادى»، - دەدى ت. سۇلەيمەنوۆ.
ق ر پرەمەر-مينيسترى باقىتجان ساعىنتايەۆ مەملەكەتتىك ورگاندارعا وتىرىس بارىسىندا ايتىلعان بارلىق ەسكەرتۋلەردى پىسىقتاپ، قاجەتتى وزگەرىستەر ەنگىزۋ تۋرالى تاپسىرما بەردى.
