الاكولدە شومىلىپ جۇرگەن ءبىر مەكتەپ ءمۇعالىمى التىن بالىق ۇستاپ الىپتى. التىن بالىققا ءتىل ءبىتىپ:
– اعاتاي، مەنى بوساتشى، ءۇش تىلەگىڭدى ورىندايىن، – دەپتى. سوندا ءمۇعالىم ءۇش تىلەگىن ايتىپتى:
"ءبىرىنشى – بۇگىنەن باستاپ ق ر ءبىلىم جانە عىلىم ءمينيسترىن، پارلامەنت دەپۋتاتتارىن جانە مەكتەپ ديرەكتورلارىن مەنىڭ جالاقىما وتىرعىز!
ەكىشى – ماعان ءمينستردىڭ جالاقىسىنىڭ كولەمىندە ايلىق بەرگىز!
ءۇشىنشى – ق ر اتازاڭىنداعى 7- باپتىڭ 2 - تارماعىن الىپ تاستا!
مەن سەنى بۇگىننەن باستاپ اكۆاريۋمدا ۇستايمىن. قاشان تەلەارنادان وسى وزگەرىستەر تۋرالى جاڭالىق حابارى بەرىلەدى سول كۇنى الاكولىڭە اكەلىپ قويا بەرەمىن. ال قازىردەن باستاپ ءۇش تىلەگىمدى ورىنداۋعا كىرىس!" – دەپتى.
ءمۇعالىم التىن بالىقتى ۇيىنە اكەلىپ، اكۆاريۋمعا سالىپ، تاڭداعان تاماعىن بەرىپ اسىراپتى. سودان ءبىر ايعا ءبىر كۇن قالعاندا "حابار" ارناسىنان ديكتور مىنانداي جاڭالىقتاردى حابارلاپتى:
– بۇگىن ق ر ءبىلىم جانە عىلىم ءمينيسترى ۇزاققا سوزىلعان اشتىقتان قايتىس بولدى. ول جاڭا پانتيونعا جەرلەنەدى.
– بۇگىن استانادا پارلامەنت دەپۋتاتتارى جالاقىلارىن كوبەيتىپ، ءۇش ۋاقىت تەگىن تاماقپەن قامتاماسىز ەتۋ تۋرالى تالاپ قويىپ، الاڭعا بەيبىت شەرۋگە شىقتى. بەيبىت شەرۋدى ۇيىمداستىردى دەگەن كۇدىكپەن سەنات ءتوراعاسى مەن ءماجىلىس ءتوراعاسىن پوليسيا ساربازدارى اۆتوبۋستارىنا قولدارىن قايىرىپ، زورلاپ كىرگىزىپ الىپ كەتتى.
– بۇگىن شقو-دا مەكتەپ ديرەكتورى وبلىستىق ءبىلىم باسقارماسىنىڭ باستىعىنا ءوزىن مۇعالىمدىك جۇمىسقا اۋىستىرۋ ءۇشىن پارا بەرىپ جاتقان جەرىندە ۇستالدى. ءبىر ەسكەرەتىن جاعداي رەسپۋبليكا كولەمىندە مەكتەپ ديرەكتورلارىنىڭ مۇعالىمدىك جۇمىسقا اۋىسۋ ءۇشىن جوعارى جاققا پارا بەرۋى كۇرت وسۋدە.
– بۇگىن استانادا ۇكىمەت ۇيىندەگى وتىرىستا ق ر پرەمەر ءمينيسترى قازاقستاندا بارلىق دەڭگەيدەگى جيىندار، ءىس-قاتىناس قۇجاتتارى مەملەكەتتىك تىلگە 100 پايىز كوشكەنى تۋرالى مالىمدەمە جاسادى.
– بۇگىن قازاقستان حالىقتار اسسامبلەياسىنىڭ مۇشەلەرى بوس ۋاقىتتارىن تولتىرۋ ءۇشىن ابايدىڭ، ماعجاننىڭ، مۇقاعاليدىڭ ولەڭدەرىن جاتقا وقۋدان جارىس وتكىزدى.
باس جۇلدەنى سلاۆيان قوعامىنىڭ ءتوراعاسى يەمدەندى. جەڭىمپازداردى قۇتتىقتاعان ەلباسى جارىسقا قاتىسۋشىلار مەن بارلىق مۇشەلەرگە، ولار تەك مەملەكەتتىك تىلدە سويلەمەي، وزدەرىنىڭ انا تىلدەرىن دە ۇمىتپاۋىن قاتتى تاپسىردى!
وسىلاي شەشىمىن تاپپاي كەلە جاتقان تالاي ماسەلەنى التىن بالىق ۇستاعان ءمۇعالىم ءبىر-اق كۇندە شەشىپ، ءبارىن "ءبۇلدىرىپتى"...
ايمۇحانبەت بەيسەمبەكوۆ
